Sangli News : जिल्ह्यातील ४९९ अंगणवाड्यांमध्ये सौर ऊर्जा संयंत्र बसवण्यात आले आहेत. यापैकी साडेतीनशेहून अधिक अंगणवाड्यांमध्ये वीजनिर्मिती सुरू झाली आहे. काही अंगणवाड्यांमधील सौर ऊर्जेची कामे लवकरच ही कामे पूर्ण होऊन अंगणवाड्यांमध्ये वीज सुरू होईल, अशी माहिती संबंधित विभागाच्या सूत्रांनी दिली.

जिल्ह्यात २७८२ अंगणवाड्या आहेत. त्यापैकी जवळपास ५०० अंगणवाड्यांमध्ये विजेची सोय आहे. काही अंगणवाड्यांमध्ये विजेची सुविधा नाही. अंगणवाड्यांचे कामकाज दिवसा होत असल्याने त्यांना वीज पुरवठ्याकडे दुर्लक्ष झाले होते. आता अंगणवाड्यांचे रुपडे बदलत आहे. तेथेही आधुनिक सुविधा येत आहेत.

वजनकाटे, शिक्षणासाठी प्रोजेक्टर, संगणक अशा सुविधांची आवश्‍यकता भासत आहे. तसेच पंखे, शुद्ध आणि स्वच्छ पाण्यासाठी आवश्यक विजेची उपकरणेही आता अंगणवाड्यांमध्ये येत आहेत. त्यामुळे तेथे विजेची आवश्‍यकता भासत आहे. त्यामुळे ४९९ अंगणवाड्यांमध्ये सौर ऊर्जा संयंत्र बसवण्यात आले आहेत.

एका दिवशी सुमारे २५०० युनिट वीज

सौर ऊर्जा संयंत्र बसवण्यात आलेल्या सर्व अंगणवाड्यांमध्ये मिळून सुमारे २५०० युनिट तयार होणार आहे. या अंगणवाड्यांची सध्याची विजेची आवश्‍यकता ही सुमारे २००० ते २५०० युनिट आहे. अंगणवाड्यांमध्ये बसवलेल्या जनरेशन मीटरमधून ‘महावितरण’ला किती युनिट वीज गेली, याची माहिती मिळणार आहे. ‘महावितरण’ची किती वीज वापरली, यावरून अंगणवाड्यांची राखीव वीज किती, हे स्पष्ट होईल.

अंगणवाड्यांची आवश्‍यकता ४-५ युनिटची

सध्या अंगणवाड्यांमधील विजेची आवश्‍यकता सुमारे चार ते पाच युनिट प्रतिदिवस आहे. भविष्यात अंगणवाड्यांमध्ये विजेची उपकरणे वाढल्यास विजेची आवश्‍यकताही भासू शकते.

त्यामुळे प्रत्येक अंगणवाडीच्या सौर ऊर्जा संयंत्राद्वारे किमान पाच युनिट विजेची निर्मिती होईल, अशा या उद्देशाने प्रत्येक अंगणवाडीवर सौर ऊर्जा संयंत्र बसवण्यात आले आहे. ‘महावितरण’कडून वीज मीटरही बसवण्यात आले आहेत.