Nandurbar News : ग्रामीण आणि दुर्गम भागातील शैक्षणिक हेळसांड थांबावी, या हेतूनेच अनेक जिल्हा परिषद शाळांची इमारत बांधणी हाती घेतली. जास्तीत जास्त शैक्षणिक सुविधा मिळवून देण्यास जिल्हा परिषद अध्यक्ष म्हणून कायम प्राधान्य दिले.

ग्रामीण भागाचा शैक्षणिक कायापालट घडविण्यासाठी आम्ही सदैव शिक्षकांच्या पाठीशी असल्याचे जिल्हा परिषद अध्यक्ष डॉ. सुप्रिया गावित यांनी गुरुवारी (ता. ५) येथे सांगितले. जिल्हा परिषदेच्या याहामोगी सभागृहात प्राथमिक शिक्षण विभाग, जिल्हा परिषद, नंदुरबार अंतर्गत जिल्हा शिक्षक पुरस्कार वितरण झाला.

त्या वेळी त्या अध्यक्षस्थानावरून बोलत होत्या. माजी जिल्हा परिषद अध्यक्ष डॉ. कुमुदिनी गावित, वित्त व शिक्षण समितीचे सभापती गणेश पराडके, बांधकाम व आरोग्य समिती सभापती हेमलता शितोळे, समाजकल्याण सभापती शंकर पाडवी, माजी जिल्हा परिषद सदस्य प्रकाश गावित, शिक्षणाधिकारी वंदना वळवी, उपशिक्षणाधिकारी डॉ. युनूस पठाण आदी उपस्थित होते. यांचा झाला गौरव

नंदुरबार तालुका : मनोजकुमार पोपट चौधरी (सेजवे), नवापूर : सरिता वळवी (सोनारेदिगर), शहादा तालुका : लक्ष्मी रूपदे (शिरूड दिगर), तळोदा तालुका : दिलीप पाटील (तऱ्हावद पुनर्वसन शाळा क्र.७), अक्कलकुवा : आशाबेन पटेल (ब्राम्हणगाव), धडगाव : रवींद्र शिंदे (तोरणमाळ). विशेष उत्तेजनार्थ : चेतन शिंदे (कलमाडी, बोरद, ता.शहादा) व अविनाश गावित (कात्री, ता. धडगाव). मुख्यमंत्री स्वच्छ व सुंदर शाळा अभियान स्पर्धेचा निकाल या वेळी घोषित करण्यात आला. त्यात जिल्हा परिषदेच्या तीन व खासगी व्यवस्थापनातील तीन शाळांना अनुक्रमे प्रथम, द्वितीय व तृतीय पुरस्काराने सन्मानित करण्यात आले.