Chhatrapati Sambhajinagar : खरीप २०२४ पीकविमा अतिवृष्टी अनुदान, कर्जमाफी, कर्ज वसुली स्थगिती, पुनर्गठन तसेच उसाचा भाव जाहीर न करताच सुरू असलेली ऊसतोड साखर कारखान्याकडून तत्काळ भाव जाहीर करावा

या मागण्यासाठी अहिल्यानगर-छत्रपती संभाजीनगर महामार्गावरील ईसरवाडी फाटा (ता. गंगापूर) येथे शुक्रवारी (ता.20) सकाळी दहा वाजता शेतकरी कृती समितीच्यावतीने रस्ता रोको आंदोलन करण्यात आले.

यावेळी सरकार विरोधात जोरदार घोषणाबाजी करण्यात आली. राहुल ढोले, महेश गुजर, अण्णासाहेब जाधव, योगेश शेळके, शेतकरी नेते भाऊसाहेब शेळके, सरपंच धनंजय ढोले, जनार्धन निकम, चेअरमन बाबासाहेब सुकासे, विठ्ठल कुंजर, संतोष खवले, जगन्नाथ ढोले, लक्ष्मण ढोले, वसंत गावंडे, रवींद्र निकम यांच्या नेतृत्वाखाली मोठ्या संख्येने परिसरातील शेतकऱ्यांनी हे आंदोलन करण्यात आले.

आंदोलनाच्या ठिकाणी शेंदुरवादा, सावखेडा, मांगेगाव, गुरू धानोरा, दहेगाव, लिंबे जळगाव, सह गंगापूर तालुक्यातील विविध ठिकाणाहून मोठ्या प्रमाणावर शेतकरी उपस्थित होते. यावेळी तब्बल अर्धा तास चाललेल्या रस्ता रोको आंदोलनात घोषणाबाजी करण्यात आली. यावेळी रस्ता रोको मध्ये सरकार विरोधी घोषणांनी परिसर दणाणून गेला होता.

दुतर्फा वाहनांच्या लांबच लांब रांगा लागल्या होत्या. यावेळी शेतकरी कृती समितीच्या समन्वयकांनी आपल्या मागणीची निवेदन महसूल विभागाचे मंडळ अधिकारी अभय साब्दे, तलाठी प्रकाश गायकवाड सहाय्यक निबंध के. एम. चौधरी उप पोलिस निरीक्षक रमेश राठोड यांना देण्यात आले.