रात्री थंडी व दुपारी वाढलेल्या तापमानाचा कलिंगडाच्या प्लॉटवर मोठा परिणाम होत आहे. यंदा १५ एकरात लागवड केलेली आहे. सध्या जागेवरच १० रुपयांपर्यंत किलोचा दर मिळतो आहे. माझ्या शेतातील काही क्षेत्रातील मालाची आठवडाभरात तोडणी करावी लागणार आहे. अचानक वातावरणात असा विलक्षण बदल झाल्याने कलिंगडाचे वेल सुकत आहे. यामुळे उत्पादनाला मोठा फटका बसू शकतो.

यावर्षी उन्हाळा लवकर चालू झाला की काय असे वातावरण आहे. त्यामुळे भुईमूग, कलिंगड यासारख्या पिकांना फटका बसतो आहे. पिकाला ताण बसतो आहे. पाणी देण्यासाठी दिवसाला आठ तास वीज भेटते आहे. मात्र, दिवसा पाणी दिल्यामुळे पिकाला जैविक- अजैविक ताण बसत आहे. यामुळे पिकाला मॅच्युरिटी स्टेज लवकर आल्याचे दिसते. पिकाला लवकर फुले लागायला सुरुवात झाली असून यामुळे उत्पादनामध्ये घटीची शक्यता अधिक आहे.

तापमानात वाढ झाल्याने पिकांची पाण्याची गरज वाढली आहे. कांदा, लसूण या सारख्या पिकात अकाली परिपक्वता येऊ शकते. परिणामी उत्पादनाला फटका बसतो. मिरचीच्या पिकात फुलगळ होऊ शकते. भाजीपाला, फळबागवर्गीय यासाठी शिफारशीत उपाययोजना कराव्यात. तसेच पाण्याची कमतरता भासू देऊ नये. पाण्याचा ताण पडणार नाही, याची काळजी घेणे गरजेचे राहते.