Pune News: राज्यभरातील विविध मागण्यांसाठी सुरू झालेल्या मालवाहतूकदारांच्या आंदोलनाला मोठा प्रतिसाद मिळत असल्याचा दावा महाराष्ट्र राज्य वाहनचालक, मालक प्रतिनिधी महासंघाचे अध्यक्ष डॉ. बाबा शिंदे यांनी केला आहे. बुधवारी (ता. २) पहिल्या दिवशी ५० टक्के तर गुरुवारी (ता. ३) ६० टक्के वाहने संपात सहभागी झाली.

पुढील दोन दिवसांत संप अधिक तीव्र होईल. सध्या विधानसभेचे अधिवेशन सुरू असल्याने सरकार आमच्या मागण्यांवर सकारात्मक निर्णय घेईल, अशी आशा असल्याचेही त्यांनी सांगितले.

जवाहरलाल नेहरू पोर्ट ट्रस्ट, विविध औद्योगिक वसाहतींमध्ये सर्व वाहने थांबून आहेत. तर शेतीमाल वाहतूक सुरळीत सुरू असून, काही ठिकाणी वाहनांमधील शेतीमाल बाजार समित्यांमध्ये उतरवून काही वाहनचालक, मालक आंदोलनात सहभागी झाल्याचेही शिंदे यांनी सांगितले.

शेतीमाल आणि जीवनावश्‍यक वस्तू वाहतुकीची वाहने संपात सहभागी होऊ नयेत, असे आवाहन आम्ही केले आहे, असेही त्यांनी सांगितले. ते म्हणाले, ‘‘वाहतूक पोलिसांकडून होणारी जबरदस्तीची दंडवसुली थांबवावी, आधी लावलेले दंड माफ करावेत, क्लिनरची (वाहनचालकमदतनीस) सक्ती रद्द करावी, ई-चालानसंबंधीच्या तक्रारींकडे लक्ष द्यावे, या प्रमुख मागण्यांसाठी हे आंदोलन करण्यात येत आहे.