Akola News : अकोला जिल्ह्यात जुलै २०२३ मध्ये झालेल्या अतिवृष्टीमुळे मोठे नुकसान झाले होते. भरपाईसाठी दोन लाख ५९१ बाधित शेतकऱ्याचा अहवाल तयार करण्यात आला होता. आता यापैकी एक लाख ६३ हजार १२५ शेतकऱ्यांची माहिती शासनाकडे सादर करण्यात आली असून या शेतकऱ्यांना शासनाची मदत मिळण्याचा मार्ग मोकळा झाला आहे.

जुलै महिन्यात १९, २२ आणि २३ तारखांना अनेक ठिकाणी अतिवृष्टी झाली होती. जिल्ह्यातील ५२ महसूल मंडलांपैकी ३४ मंडले अतिवृष्टीने बाधित झाली होती. अतिवृष्टी आणि पुराच्या तडाख्याने शेतकऱ्यांच्या शेतातील पीक जमीनदोस्त झाल्याने खरीप हंगामाच्या प्रारंभीच शेतकरी मोठ्या अडचणीत सापडला होता.

संयुक्त पंचनामे झाल्यानंतर शासनाकडून मदत मंजूर करण्यात आली. मात्र, अतिवृष्टीमुळे मदत वितरणाच्या कामात दिरंगाई होत होती. ही दिरंगाई करणाऱ्यावर कारवाई करा, असे आदेशही पालकमंत्री राधाकृष्ण विखे पाटील यांनी दिले होता. त्यानंतर यंत्रणा कामाला लागली आहे. तरीही अद्याप ३५ हजारांवर शेतकऱ्यांची माहिती अपलोड व्हायची आहे, अशी माहिती सूत्रांकडून मिळाली.

दोन हजार शेतकऱ्यांचे नुकसान

अतिवृष्टीचा फटका ६४० गावांतील १ लाख ६१ हजार १३६ हेक्टरवरील कोरडवाहू क्षेत्राला बसला. एका लाख ९७ हजार २८९ शेतकऱ्यांच्या पिकांचे नुकसान झाले. बागायती क्षेत्रात अतिवृष्टीचा फटका ६८७ हेक्टर क्षेत्रातील बागायती पिकांना फटका बसला. ५२ गावांमधील एक हजार ७१ शेतकऱ्यांचे नुकसान झाले. अतिवृष्टीमुळे १६५ गावांतील २ हजार ७३४.८५ हेक्टरवरील फळ पिकांची हानी झाली. दोन हजार २३१ शेतकऱ्यांचे नुकसान झाले होते.

तालुकानिहाय सादर झालेली माहिती

तालुका बाधित शेतकरी शासनाकडे सादर

अकोला ५९२९९ ४२५४३

अकोट २२४४ १७९७

बार्शीटाकळी ४१५६९ ३५९९१

तेल्हारा ३८१७३ ३४५३१

बाळापूर ४३४०३ ३४५४५

पातूर ४४ ४४

मूर्तिजापूर १५८५९ १३६७४