Nagpur News : चौकशी समितीने कळमना बाजार समितीत जात तूर्तास चौकशी करू नये असे मौखिक आदेश उच्च न्यायालयाच्या नागपूर खंडपीठाने दिल्याने संचालक मंडळाला काहीसा दिलासा मिळाला. बाजार समितीतर्फे आपली बाजू मांडून पूर्ण झाले असून, उद्या (ता. २९) राज्य शासन आपली बाजू मांडेल.

या प्रकरणावर न्यायमूर्ती अनिल किलोर आणि न्यायमूर्ती वृषाली जोशी यांच्या समक्ष सुनावणी झाली. कळमना बाजार समितीमधील गैरव्यवहार प्रकरणी चौकशीकामी राज्य शासनाने समिती नियुक्त केली आहे. या विरोधात बाजार समितीचे सभापती शेख अहमदभाई करीमभाई व संचालक मंडळाचे सदस्य किशोर पालांदुरकर यांनी याचिका दाखल केली.

१८ जुलै २०२५ या शासन निर्णयानुसार जिल्हाधिकारी, नागपूर यांच्या अध्यक्षतेखाली या समिती स्थापनेचा निर्णय घोषित करण्यात आला. या शासन निर्णयानुसार विशेष तपासणी पथकामार्फत चौकशी प्रक्रिया सुरू करण्यात आली आहे. मात्र याचिकाकर्त्यांनी या एसआयटीला आव्हान दिले आहे.

या प्रकरणी सहकार विभागाने यापूर्वीच दोनवेळा चौकशी नेमली होती. त्यामुळे या प्रकरणाची चौकशी झाली असल्याचे ॲड. मनोहर यांनी नमूद केले. तसेच या प्रकरणी उच्च न्यायालयात दोन प्रकरणे प्रलंबित आहेत. तसेच ज्या व्यवहाराची चौकशी करायची आहे तो व्यवहार अर्थात त्या दुकानांचे वाटप २०१२ मध्ये झाले. तेव्हाची कार्यकारी समिती कधीच गेली. आता २०२१ च्या कार्यकारी समितीला त्या वेळच्या व्यवहारासाठी दोषी कसे धरणार, असा प्रश्‍न ॲड. मनोहर यांनी उपस्थित केला.

याचिका दाखल होताच काढले सील

विधानसभेत या मुद्द्यावर घोषणा होताच अगदी दोनच तासांत एसआयटी नेमण्यात आली व त्यातील सदस्यांची नियुक्तीही झाली. इतकेच काय तर पुढील २४ तासांत एसआयटीने कार्यालयुद्धा सील केले. मात्र याचिका दाखल होताच दुसऱ्या दिवशी सील काढले, अशी माहिती या वेळी ॲड. मनोहर यांनी न्यायालयाला दिली. एपीएमसीतर्फे वकील विधिज्ञ सुनील मनोहर व ॲड. अजय घारे यांनी बाजू मांडली.

या ढवळाढवळीमुळे स्वायत्ततेला काय अर्थ?

संचालक मंडळातर्फे वरिष्ठ विधिज्ञ सुनील मनोहर यांनी न्यायालयात बाजू मांडली. एसआयटीच्या आदेशावरून असे दिसून येते, की राज्य सरकारला एपीएमसीच्या दैनंदिन कारभाराची चौकशी करायची आहे, असे ॲड. मनोहर यांनी नमूद केले. एपीएमसी राज्य सरकारच्या अखत्यारित येत असली तरीसुद्धा ती एक स्वायत्त संस्था आहे. दैनंदिन कामकाजात ढवळाढवळ होत असेल तर स्वायत्ततेला काय अर्थ, असा प्रश्‍न मंडळातर्फे उपस्थित करण्यात आला.