Buldana News : यावर्षीच्या हंगामामध्ये जिल्ह्यामध्ये केंद्र शासनाच्या आधारभूत किंमत योजनेअंतर्गत राज्य शासनाच्या वतीने हमीदराने मूग, उडीद व सोयाबीन खरेदी करण्यात येत आहे. यासाठी शेतकऱ्यांनी खरेदी केंद्रांवर नोंदणी करावी, असे आवाहन जिल्हा पणन अधिकारी एम. जी. काकडे यांनी केले आहे.

आधारभूत किंमत योजनेअंतर्गत ‘नाफेड’च्या वतीने हमीदराने मूग ८ हजार ६८२ रुपये, उडीद ७ हजार ४०० रुपये आणि सोयाबीन ४ हजार ८९२ रुपये प्रति क्विंटल दराने खरेदी केली जाईल.

मूग व उडीद नोंदणी व खरेदी सात जानेवारी २०२५ पर्यंत तर सोयाबीन नोंदणी १ ऑक्टोबरपासून सुरू करण्यात आली असून खरेदी १५ ऑक्टोबर पासून सुरू होईल. सोयाबीन १२ जानेवारी २०२५ पर्यंत खरेदी करण्यात येईल.

मूग, उडीद व सोयाबीन खरेदीसाठी ११ केंद्रांना मान्यता दिली आहे. या केंद्रांना नोंदणी व खरेदीचे आदेश देण्यात आलेले आहेत.

बुलडाणा, मेहकर, शेगाव, लोणार, संग्रामपूर येथे तालुका शेतकी सहकारी खरेदी विक्री समिती, साखरखेर्डा सोनपाऊल ॲग्रो प्रोड्युसर कंपनी, चिखली येथे स्वराज्य शेतीपूरक सहकारी संस्था, वरवट बकाल येथे कृषी उत्पन्न बाजार समिती, माटरगाव येथे शेगाव कृषी उत्पन्न बाजार समिती, किनगाव जट्टू येथे बिबी फार्मर प्रो. कंपनी, आणि मोताळा येथे संत गजानन कृषी विकास शेतकरी उत्पादक कंपनीच्या केंद्राला मान्यता देण्यात आली आहे.