Yavatmal News : गेल्या वर्षी पावसात भिजलेल्याने सोयाबीन बियाण्याच्या उगवणशक्तीवर परिणाम झालेला होता. त्यामुळेच गेल्या वर्षी बियाण्यांसाठी उन्हाळी सोयाबीनचा पायलट प्रकल्प राबविण्यात आला. यंदा बियाणे उपलब्ध असल्याने उन्हाळी सोयाबीनच्या पेरणीत घट झालेली आहे.

दर वर्षीची बियाणेटंचाई, चढ्याभावाने विक्री, निकृष्ट बियाण्यांमुळे उगवणशक्तीवर परिणाम, घटती उत्पादकता यावर स्वत:च उत्तर शोधत जिल्ह्यातील शेतकऱ्यांनी बियाणेनिर्मितीवर भर दिला. खरिपात ३५ टक्के बियाणे बदल या तत्त्वानुसार जिल्ह्यात बियाणे लागणार आहे. शेतकरी सोयाबीन बियाणे निर्मितीत आत्मनिर्भर बनले आहेत.

यंदा सोयाबीन बियाण्याची टंचाई भासणार नसल्याचा तज्ज्ञांचा अंदाज आहे. असे असले तरी यंदा उन्हाळी सोयाबीनचा पेरा घटला आहे. गेल्या वर्षीच्या खरीप हंगामात सोयाबीनचे नुकसान मोठ्या प्रमाणात झाले होते. बियाण्यांची टंचाई जाणवू नये, यासाठी उन्हाळी सोयाबीन पेरणीचा प्रकल्प जिल्ह्यात राबविण्यात आला.

जिल्ह्यात पहिल्यांदा साडेपाच हजार एकरवर सोयाबीनची लागवड करण्यात आली होती. यंदा सोयाबीनचे उत्पादन चांगले झाले आहे. दर्जाही चांगला आहे. त्यामुळे यंदा उन्हाळी सोयाबीन पेरणीकडे शेतकऱ्याने दुर्लक्ष केले आहे. सोयाबीनला नसलेला भाव पाहता शेतकऱ्यांनी सोयाबीनऐवजी हरभरा, गव्हाला पसंती दिली आहे.

महाबीजकडून तयारीला सुरवात

यंदा सोयाबीन बियाणे मुबलक व चांगल्या दर्जाचे उपलब्ध आहे. त्यामुळे आगामी खरीप हंगामात बियाणे टंचाईची शक्यता कमी आहे. महाबीजने खरिपाच्या तयारीला सुरुवात केली आहे. चांगल्या दर्जाचे सोयाबीनची पॅकिंग सुरू केली आहे. अद्याप बियाण्याचे उद्दिष्ट महाबीजला आलेले नसले तरी महाबीजकडून नियोजन केले जात आहे.

भावात घसरणीचा परिणाम

गेल्या वर्षी सोयाबीनला बाजारात चांगला दर होता. परिणामी, शेतकऱ्यांनी उन्हाळी सोयाबीनचा प्रयोग केला. यंदा सुरुवातीपासून सोयाबीनचे दर खाली आहेत. त्यात वाढ झालेली नाही. बाजारातील भावाचा आलेख पाहता शेतकऱ्यांनीही सोयाबीनऐवजी इतर पिकांना पसंती दिली.