Amaravati News : या वर्षी नैसर्गिक आपत्तिग्रस्तांना राज्य आपत्ती प्रतिसाद निधीच्या निकषानुसार देण्यात येणाऱ्या मदतीची क्षेत्रमर्यादा वाढविण्यात आली असली तरी मदतनिधीत मात्र कपात करण्यात आली आहे.

पाच ते तेरा हजार रुपयांची कपात राज्य सरकारने केली असून, मदतीची घोषणा करताना नुकसानग्रस्त शेतकऱ्यांची दिशाभूल व फसवणूक केल्याची भावना निर्माण झाली आहे.

जून ते ऑक्टोबर या कालावधीत अतिवृष्टीने शेतपिकांचे मोठे नुकसान झाले आहे. शेतकऱ्यांसाठी काम करणारे म्हणून या नुकसानीपोटी राज्य सरकारने मदतीचा हात समोर करण्याची घोषणा केली. विशेष म्हणजे, या नुकसानीचे पंचनामे करण्यात यंत्रणांनी विलंब केला. त्यानंतर सरकारने मदतीची घोषणा केली असली, तरी ती दिवाळीपूर्वी मात्र शेतकऱ्यांच्या खात्यात जमा झालेली नाही.

३१ ऑक्टोबरला राज्य मंत्रिमंडळाने घेतलेल्या निर्णयात नैसर्गिक आपत्तिग्रस्तांना राज्य आपत्ती प्रतिसाद निधीच्या निकषानुसार देण्यात येणाऱ्या मदतीची क्षेत्रमर्यादा वाढविण्यात आल्याचे घोषित करण्यात आले. मदतीचे क्षेत्र दोन हेक्टरहून वाढवून तीन हेक्टरपर्यंत करण्यात आले. त्याच वेळी मदतीचे निकष मात्र बदलविले. गतवर्षीच्या निकषात बदल करताना मदतनिधीत प्रति हेक्टर मोठी कपात करण्यात आली.

कोरडवाहू, बहुवार्षिक व बागायती पिकांचा निधी कपात करण्यात आला. गतवर्षी बागायती पिकांसाठी हेक्टरी २७ हजार ५०० रुपये निधी देण्यात आला. त्यामध्ये १० हजार ५०० रुपये कपात करून ती १७ हजार रुपयांवर आणली आहे.

तर बहुवार्षिक पिकांसाठी ३६ हजार रुपयांहून २२ हजार ५०० रुपये व कोरडवाहूसाठी १३ हजारांवरून ८ हजार ५०० रुपयांपर्यंत मदत देण्याचा निर्णय घेण्यात आला. गतवर्षीच्या तुलनेत नुकसानभरपाईच्या मदतनिधीत कपात करण्यात आल्याने शेतकरी नाराज झाले आहेत.

जिल्ह्यातील अतिवृष्टीने बाधित शेतकरी व क्षेत्र

क्षेत्र बाधित शेतकरी बाधित क्षेत्र अपेक्षित निधी (कोटी)

जिरायती ८५,८३१ ६२,५३९ ५३.१५

बागायत ५१० ३६६ ६.२२

फळपीक ९३३० ९१६४ २०.६१