Solapur News : जिल्ह्यातील बचतगटांना कर्ज देण्याचे बँकांचे वर्षभराचे एकूण उद्दिष्ट ३२० कोटी असताना मुख्यमंत्र्यांच्या १०० दिवसांच्या कार्यक्रमाचा फायदा होऊन हा आकडा ४१८ कोटींवर पोचला आहे. वर्षभरात एकट्या माळशिरस तालुक्यातील बचतगटांना ८० कोटींचे कर्ज वाटप करण्यात आले आहे.

जिल्ह्यातील बचत गटांना सातत्याने कर्जवाटप अधिक करण्याचा पायंडा पडला आहे. सोलापूर जिल्ह्यात उमेद, बॅंक व बचत गटांच्या एकत्रित कामगिरीने हा आकडा वाढता राहिला आहे. यावर्षी देखील मार्च अखेरीस कर्ज वाटपाचा आकडा वाढला आहे. या आधी या आर्थिक वर्षात ३२० कोटी रुपयांचे कर्जवाटपाचे उद्दिष्ट ठरले होते.

त्यानंतर मुख्यमंत्र्यांचा १०० दिवसाचा कार्यक्रम जाहीर झाला. त्यामध्ये देखील कर्जवाटपाचे उद्दिष्ट वाढवून घ्यावे असे ठरले. त्यामुळे उर्वरित कर्ज प्रस्तावांना मंजुरी मिळाली आहे. बॅंकांनी घेतलेला पुढाकार पाहता बचतगटांना जोरदार संधी मिळाली आहे. तसेच बचत गटांनी पुढाकार घेऊन काही व्यवसाय व शेतकरी उत्पादक कंपन्या देखील स्थापन केल्या आहेत.

तालुकानिहाय बचत गटांना आतापर्यंत झालेले बचत गटांची संख्या व कर्ज वाटप

तालुका बचतगटांची संख्या कर्जाची रक्कम

उत्तर सोलापूर ८३७ ३४ कोटी ७६ लाख

मंगळवेढा ५९५ ३४ कोटी २१ लाख

माढा १११६ ५३ कोटी ९० लाख

माळशिरस १५२३ ८० कोटी १५ लाख

बार्शी ८०० ३८ कोटी ८१ लाख

सांगोला ७८८ ४२ कोटी ६२ लाख

पंढरपूर ९३८ ४१ कोटी ३४ लाख

मोहोळ ७२७ ३५ कोटी चार लाख

द.सोलापूर ५८४ २५ कोटी ९७ लाख

करमाळा ३५३ १६ कोटी ८० लाख

अक्कलकोट ४३४ १५ कोटी १८ लाख

एकूण सोलापूर जिल्हा ८६९५ ४१८ कोटी ९५ लाख