Jalgaon News : महसूल विभागाने २०२४-२०२५ या आर्थिक वर्षात उद्दिष्टापेक्षा जास्त म्हणजे १३९.२६ टक्के महसूल कर वसूल केला आहे. गेल्या काही वर्षातील वसुलीचा हा उच्चांक आहे. वसुलीत अमळनेरचा जिल्ह्यात द्वितीय क्रमांक आला आहे. ‘प्रपत्र-अ’मध्ये जमीन महसूल, बिन शेतीसारा व नजराणा आदी प्रकारच्या रकमेतून करवसुली होत असते, तर ‘प्रपत्र- ब’मध्ये गौणखनिज दंड, करवसुली आदी प्रकारची वसुली होत असते.

गेल्या २०२१-२०२२ या आर्थिक वर्षात ‘प्रपत्र अ’मध्ये २.७० कोटी व ‘प्रपत्र ब’मध्ये ५.१८ कोटी असे एकूण ७.८८ कोटी रुपये वसूल करून ७०.०४ टक्के उद्दिष्ट साध्य केले होते. २०२२-२३ या आर्थिक वर्षात ‘प्रपत्र अ’मध्ये १.६२ कोटी रुपये, प्रपत्र बमध्ये ३.९० कोटी रुपये असे एकूण ५.५२ कोटी रुपये वसूल करून ६७.७३ टक्के उद्दिष्ट पूर्ण केले होते.

२०२३-२४मध्ये प्रपत्र अमध्ये ३.७३ कोटी रुपये व प्रपत्र बमध्ये ५.९८ कोटी रुपये असे एकूण ९.७१ कोटी रुपये वसूल करून १०३.७४ टक्के उद्दिष्ट साध्य केले. मात्र, २०२४-२५ या आर्थिक वर्षात विक्रमी वसुली केली आहे.

प्रपत्र अमध्ये ३.५७ कोटी रुपये, तर प्रपत्र बमध्ये ९.५९ कोटी रुपये असे एकूण १३.७१ कोटी रुपये वसूल केले. चालू आर्थिक वर्षात १३९.२६ टक्के उद्दिष्ट साध्य केले आहे. यासाठी उपविभागीय अधिकारी नितीनकुमार मुंडावरे, उपविभागीय कार्यालयातील कर्मचारी, तहसीलदार रूपेशकुमार सुराणा, मंडळाधिकारी, तलाठी, कर्मचारी यांचे सहकार्य लाभले.

बिन शेतसाराचे १५ कोटी रुपये थकीत

नागरिक रिकामा प्लॉट घेऊन ठेवतात. त्यानंतर तेथे काही वर्षांनी घर बांधले जाते. प्लॉटचे रूपांतर घरात झाल्याने ते सिटी सर्व्हेकडे वर्ग होते. नागरिक महसूल कर भरणे बंद करतात. प्रत्यक्षात मात्र, सिटी सर्व्हे विभागाने असेसमेंट करून बिनशेतीसारा प्रकरण उपविभागीय अधिकाऱ्यांकडे पाठवायला पाहिजे.

तेथून नागरिकांकडे बिनशेतीसारा यादी तलाठ्यांकडे येते व तलाठी तो वसूल करतात. मात्र, गेल्या १५ वर्षांपासून ही प्रक्रिया राबविली गेलीच नाही. त्यामुळे नागरिकांना याबाबत काहीच माहिती नाही, असा बिनशेतीसारा म्हणून सुमारे १५ कोटी रुपये अंदाजित थकबाकी नागरिकांकडे असल्याची माहिती तहसीलदार रूपेशकुमार सुराणा यांनी दिली.