Sindhudurga News : जिल्ह्यातील तिलारी (ता. दोडामार्ग) संवर्धन राखीव क्षेत्रात वनश्री फाउंडेशनचे संजय सावंत यांना कचूर (बोसेनबर्गिया टिलीफोलिया) ही वनस्पती आढळून आली आहे. राज्यात प्रथमच या वनस्पतीची नोंद झाली आहे.

श्री. सावंत यांना तिलारी संवर्धन राखीव क्षेत्रात सप्टेंबर २०२४ मध्ये एक वैशिष्ट्यपूर्ण वनस्पती दिसून आली. या वनस्पतीची छायाचित्रे त्यांनी वनस्पतिशास्त्र अभ्यासक डॉ. प्रा. विजय पैठणे आणि संभाजीनगर येथील वनस्पती शास्त्र विभागाचे प्रमुख डॉ. अनिल भुक्तार यांना पाठवून दिली. श्री. पैठणे आणि डॉ. भुक्तार यांनी तमिळनाडू वनस्पती शास्त्रज्ञांसमवेत चर्चा केल्यानंतर ती वनस्पती बोसेनबर्गिया टिलिफोलिया असल्याचे स्पष्ट झाले.

मराठीत या वनस्पतीला कचूर किवा कचूरकपारी असे म्हटले जाते. या वनस्पतीला निलगिरी फिंगररूट या नावानेदेखील ओळखले जाते. अधिकतर ही वनस्पती कर्नाटक, तमिळनाडू, केरळमध्ये आढळून येते. नुकतीच या वनस्पती संशोधनाची नोंद जर्नल ऑफ थ्रेटन्ड टॅक्सामध्ये झाली आहे. त्यामुळे सिंधुदुर्ग आणि राज्यांच्या जैवविविधतेत आणखी एका वनस्पतीची नोंद झाली आहे.