Sindhudurg News : सिंधुदुर्ग जिल्ह्याच्या काही भागात रविवारी (ता.१२) विजांच्या लखलखाटांसह जोरदार पाऊस झाला. दरम्यान, सोमवारी (ता.१३) सकाळपासून जिल्ह्यात ढगाळ वातावरण असून कोणत्याही क्षणी पाऊस पडेल अशी स्थिती आहे. जिल्ह्यात पडत असलेल्या पावसामुळे आंबा, कजू बागायतदारांचे नुकसान अटळ आहे.

जिल्ह्यात गेल्या काही दिवसांपासून उष्णतेची लाट सदृश्य वातावरण आहे. वाढलेल्या तापमानवाढीने नागरिक हैराण झाले आहेत. शनिवारी (ता.१३) बांदा, सावंतवाडी, कणकवली, वैभववाडी, कुडाळ तालुक्यांत जोरदार पाऊस झाला.

सर्वत्र पावसाच्या जोरदार सरी कोसळल्या होत्या. त्यानंतर रविवारी दिवसभर ढगाळ वातावरण होते. सायकांळी उशिरा सावंतवाडी परिसरात पावसाला सुरुवात झाली. विजांचा लखलखाट आणि जोरदार वारा यामुळे सावंतवाडी परिसरात काही काळ वीजपुरवठा देखील खंडित झाला होता.

दरम्यान सोमवारी सकाळपासून जिल्ह्यात ढगाळ वातावरण आहे. कोणत्याही क्षणी पाऊस पडेल अशी स्थिती निर्माण झाली आहे.जिल्ह्यात सध्या आंबा हंगाम अंतिम टप्प्यात आहे. याशिवाय अतिंम टप्प्यातील काजू बी गोळा करण्याचे काम सुरू आहे.

या पावसामुळे अंतिम टप्प्यातील आंबा पीक वाया जाण्याची शक्यता आहे. दरम्यान, हवामान विभागाने १५ मे पर्यंत पाऊस पडण्याचा अंदाज दिला आहे. त्यामुळे आंबा, काजू बागायतदार चांगलेच धास्तावले आहेत.