Parbhani Rabi Sowing : कृषी आणि महसूल विभागाकडून यंदाच्या (२०२२-२३) रब्बी हंगामातील पेरणी क्षेत्र गुरुवारी (ता. ९) अंतिम करण्यात आले. त्यानुसार परभणी जिल्ह्यात यावर्षी २ लाख ९५ हजार ४६२ हेक्टरवर (१०९.११ टक्के) पेरणी झाली.

गतवर्षीच्या तुलनेत यंदा रब्बीच्या क्षेत्रात ४० हजार ९९५ हेक्टरने वाढ झाली आहे. या ही वर्षी शेतकऱ्यांनी हरभऱ्याला (Chana Sowing) सर्वाधिक पसंती दिली असून यंदाच्या एकूण रब्बी क्षेत्रामध्ये एकट्या हरभऱ्याचे क्षेत्र ५८.४८ टक्के आहे, अशी माहिती जिल्हा अधीक्षक कृषी अधिकारी विजयकुमार लोखंडे यांनी दिली.

यंदा जिल्ह्यात रब्बीचे सरासरी क्षेत्र २ लाख ७० हजार ७९४ हेक्टर होते. गतवर्षीप्रमाणेच यंदाही विहिरी, विंधन विहिरी, लघु, मध्यम, मोठे प्रकल्प आदी सिंचन स्त्रोतांना पुरेशा प्रमाणात पाणी उपलब्ध राहिले.

त्यामुळे जिल्ह्यातील रब्बीच्या क्षेत्राने यंदा सलग तिसऱ्या वर्षी सरासरी क्षेत्राचा टप्पा पार केला आहे. गतवर्षीच्या यंदा तुलनेत हरभऱ्याच्या क्षेत्रात ३६ हजार ७३४ हेक्टरने, ज्वारीच्या क्षेत्रात ४ हजार ४८१ हेक्टरने, करडईच्या क्षेत्रात ५२७ हेक्टरने वाढ झाली.

गव्हाच्या क्षेत्रात गतवर्षीच्या तुलनेत यंदा ७४५ हेक्टरने घट झाली आहे. मक्याचे क्षेत्रही कमी झाले आहे. जवस, सूर्यफूल या गळितधान्यांच्या क्षेत्रातील घट कायम आहे.

यंदा तृणधान्यांची १ लाख ५४ हजार ८७६ पैकी १ लाख २० हजार ६६८ हेक्टर (७७.९१ टक्के), कडधान्यांची १ लाख २२ हजार २७२ पैकी १ लाख ७३ हजार १०० हेक्टर (१५४.१८ टक्के), गळीत धान्यांची ३ हजार ६४४ पैकी १ हजार ६९३ हेक्टर (४६.४७ टक्के) पेरणी झाली आहे.

यंदा परभणी, सेलू या दोन तालुक्यात सरासरीपेक्षा कमी तर जिंतूर, मानवत, पाथरी, सोनपेठ, गंगाखेड, पालम, पूर्णा या सात तालुक्यांत सरासरीपेक्षा जास्त क्षेत्रावर पेरणी झाली आहे.

पीकनिहाय रब्बी अंतिम पेरणी क्षेत्र (हेक्टरमध्ये)

पीक - सर्वसाधारण -पेरणी क्षेत्र - टक्केवारी

ज्वारी - ११३०८९ - ८५७२२ - ७५.८०

गहू - ३९३०८ - ३३१२६ - ८४.२७

हरभरा - ११२१७० - १७२७९३ - १५४.०४

करडई - ३३७१ - १५०६ - ४४.५९

जवस - ११९ - ३६.२० - ३०.४२

सूर्यफूल - २६.२० - ९.०० - ३४.३५

मका - २०८६ - १३३९ - ६४.१७

तालुकानिहाय अंतिम पेरणी क्षेत्र (हेक्टरमध्ये)

तालुका - सर्वसाधारण - पेरणी - टक्केवारी

परभणी - ५७९०० - ५६६४०- ९७.८२

जिंतूर - ५३७३०- ६०००१ - १११.६७

सेलू - ३३५६१- ३३३०८ - ९९.२५

मानवत - १६११९ - २००६९ - १२४.५१

पाथरी - १७०७२ - १८२४८ - १०६.८८

सोनपेठ- १५६९८ - १५८६४ - १०१.०६

गंगाखेड - ३२०८६ - ३२६५८ - १०१.७८

पालम- २०१३० - २१३७६ - १०६.१९

पूर्णा - २४४९५ - ३७२९७ - १५२.२६

तुलनात्मक रब्बी पेरणी क्षेत्र (हेक्टरमध्ये)

वर्षे - सरासरी क्षेत्र - पेरणी क्षेत्र - टक्केवारी

२०२०-२१ - २१५९६१ २५९९०० १२०.३९

२०२१-२२ २१५९६१ २५४४६७ ११७.८२

२०२२-२३ २७०७९४ २९५४६२ १०९.११