Pune News: रब्बी हंगामातील ज्वारीची पिके काढणीच्या अवस्थेत आली आहेत. सध्या थंडी कमी-अधिक होत असल्याने फेब्रुवारी महिन्यापासून काढणीस चांगलाच वेग येईल, अशी शक्यता आहे. तर अनेक ठिकाणी काढणीस सुरुवातही झाली आहे.

गेल्या महिन्यात व चालू महिन्यात अधूनमधून ढगाळ वातावरणामुळे थंडी कमी-अधिक होत असल्याने ज्वारीवर रोग, किडीचा प्रादुर्भाव झाला, मात्र शेतकऱ्यांनी वेळीच योग्य त्या उपाययोजना केल्याने फारसा प्रादुर्भाव झाला नाही. अनेक ठिकाणी पिके जोमदारपणे आली आहेत.

पुणे विभागात सरासरी सात लाख २० हजार २२७ हेक्टरपैकी २ लाख ४० हजार २३१ हेक्टर म्हणजेच ६८ टक्के पेरण्या झाल्या आहेत. सध्या बागायत भागातील गहू, हरभरा पिके वाढीच्या अवस्थेत असून ज्वारीच्या पिके काढणीच्या अवस्थेत आहे.

पुणे जिल्ह्यातील पश्चिमेकडील मावळ, मुळशी, भोर, वेल्हा तालुके ही खरिपाची पिके म्हणून ओळखली जातात. त्यामुळे रब्बी हंगामात या तालुक्यात अत्यंत कमी प्रमाणात पेरणी झाल्याचे दिसून येते.

पू्र्वेकडील शिरूर, बारामती, इंदापूर, दौंड, पुरंदर, खेड, आंबेगाव, जुन्नर तालुक्यांत रब्बीची मोठ्या प्रमाणात पेरणी झालेली आहे. त्यातच उशिराने साखर कारखाने सुरू झाल्याने ज्वारीऐवजी गहू आणि हरभरा पिकांना प्राधान्य दिल्याचे दिसून येते.