Jowar Farming : दादर ज्वारी निसवू लागली

Jalgaon News : खानदेशात दादर ज्वारीची पेरणी यंदा अपेक्षेएवढी झालेली नाही. अनेकांनी कोरडवाहू क्षेत्रात ज्वारीऐवजी हरभरा पेरणी केली आहे. ऑक्टोबरमध्ये पेरलेले ज्वारी पीक निसवू लागले आहे.

जळगाव जिल्ह्यात ज्वारीची एकूण सुमारे ५१ हजार हेक्टरवर पेरणी झाली आहे. यात कोरडवाहू दादर ज्वारीची सुमारे १५ हजार हेक्टरवर पेरणी झाली आहे. धुळ्यातही शिरपूर, धुळे, शिंदखेडा, नंदुरबारात शहादा, नंदुरबार भागात कोरडवाहू दादर ज्वारी पीक असून, खानदेशात सुमारे २० हजार हेक्टरवर कोरडवाहू दादर ज्वारी आहे. यंदा पाऊसमान चांगले होते.

कोरडवाहू दादर ज्वारीची जळगाव, चोपडा, अमळनेर, शिंदखेडा, शिरपूर आदी भागांत शेतकरी पेरणी करतात. तापी, पांझरा, अनेर नदीकाठी हे पीक असते. कमी खर्चिक व जमीन सुपीकतेसाठी उपयोगी पीक म्हणून दादर ज्वारीला शेतकरी पसंती देतात. दादर ज्वारीची पेरणी यंदा ऑक्टोबरच्या अखेरीस झाली आहे.

ऑक्टोबरमध्येही पाऊस होता. यामुळे अनेक शेतकरी वेळेत पेरणी करू शकले नाहीत. त्यात काही शेतकऱ्यांनी दादर ज्वारीसाठी क्षेत्र नापेर ठेवले होते. त्याची पूर्वमशागत करून ठेवली होती. वाफसा दिसताच पेरणी करून घेतली. ऑक्टोबरमध्ये पेरणी केलेले दादर ज्वारीचे पीक निसवू लागले आहे. याच आठवड्यात निसवणीला गती आली आहे.

यंदा डिसेंबरमध्ये पाऊस झाल्याने कोरडवाहू दादर ज्वारीला लाभ झाला. आता पीक निसवत असून, ओलावा असल्याने जोमात वाढ होत आहे. अनेक शेतकऱ्यांनी यंदा दादर ज्वारी पिकात अळीनाशकाची फवारणीदेखील घेतली आहे.

कारण काही भागात अळ्यांचा प्रकोप पिकात दिसत होता. काही शेतकऱ्यांनी संकरित, सुधारित दादर ज्वारीची पेरणी केली असून, पिकास एक वेळेस पाणीही दिले आहे. दादर ज्वारीची उंची चांगली असते. वाढ १० ते १२ फूट एवढी होते. दादर ज्वारीचा चारा अन्य चाऱ्यांच्या तुलनेत महाग व सकस असल्याने त्यास मागणीदेखील असते. यंदा चाराही बऱ्यापैकी दादर ज्वारी पिकातून मिळेल, अशी स्थिती आहे.