Pune News: पुणे जिल्ह्यातील धरणांत एक मे ते ३१ जुलै अशा तीन महिन्यांच्या काळात तब्बल ३२०.१९ टीएमसी पाण्याची आवक झाली आहे. जिल्ह्याच्या पश्चिम पट्ट्यात तसेच घाटमाथ्यावर मुसळधार पाऊस कोसळत आहे. त्यामुळे धरणांत पाण्याची वेगाने आवक वाढली असून जिल्ह्यातील जवळपास १९ धरणांतून पाण्याच्या विसर्गात वाढ करण्यात आली आहे. त्यामुळे भीमा, मुठा, पवना, आरळा, कुकडी, मीना, नीरा, घोड, हंगा या नद्यांच्या पाणी पातळीत चांगलीच वाढ झाली आहे.

चालू वर्षी मे महिन्यापासून पावसाला सुरुवात झाली. मे अखेरीस पावसाने चांगलाच धुमाकूळ घातला. त्यानंतर धरणात आवक सुरू झाली होती. त्यामुळे ३० मे पर्यंत जवळपास २० टीएमसी पाण्याची आवक झाली होती. तर एक जूनपासून पुन्हा हळूहळू पावसाचा जोर वाढत गेला होता.

त्यामुळे धरणात पाण्याची वेगाने वाढ होत गेली होती. मागील दोन महिन्यांत तब्बल ३००.१९ टीएमसी एवढ्या पाण्याचा येवा दाखल झाला आहे. त्यामुळे जिल्ह्यातील बहुतांश धरणे भरली असून पाण्याचा विसर्ग सोडण्यात आला आहे. अजूनही हा विसर्ग सुरू असल्याने नदीकाठच्या गावांना सतर्कतेचा इशारा देण्यात आला आहे.

जुलै अखेरीस पावसाचा जोर वाढला आहे. त्यामुळे सध्या जिल्ह्यातील एकूण असलेल्या २६ धरणांत एकूण क्षमता असलेल्या १९८.३४ टीएमसीपैकी सुमारे १७६.१३ टीएमसी म्हणजेच ८८ टक्के एवढा उपलब्ध पाणीसाठा आहे. आता ऑगस्ट महिना सुरू झाला असून मागील चोवीस तासांमध्ये ७.६० टीएमसी एवढ्या पाण्याची नव्याने आवक झाली आहे.

आतापर्यंत मुठा खोऱ्यातील टेमघर, वरसगाव, पानशेत, खडकवासला या धरणांत उपयुक्त क्षमता असलेल्या २९.१५ टीएमसीपैकी ४१ टीएमसी एवढ्या पाण्याचा नव्याने येवा दाखल झाला आहे. नीरा खोऱ्यातील पवना, कासारसाई, कळमोडी, चासकमान, भामा आसखेड, आंध्रा, वडिवळे, शेटफळ, नाझरे, गुंजवणी, भाटघर, नीरा देवघर, वीर या धरणाच्या उपयुक्त क्षमता असलेल्या ४८.३३ टीएमसीपैकी ६९.५४ टीएमसी

तर कुकडी खोऱ्यातील पिंपळगाव जोगे, माणिकडोह, येडगाव, वडज, डिंभे, चिल्हेवाडी, घोड या धरणांत उपयुक्त क्षमता असलेल्या ३५.३५ टीएमसी पैकी ४१.८२ टीएमसी एवढ्या पाण्याचा येवा दाखल झाला आहे. तर उजनीत उपयुक्त क्षमता असलेल्या ५३.५७ टीएमसीपैकी १०९.०२ टीएमसी, मुळशीत २०.१६ टीएमसीपैकी २१.७८ टीएमसी एवढ्या पाण्याचा येवा दाखल झाला आहे.  

शुक्रवारी (ता. १) सकाळी आठ वाजेपर्यंत धरणक्षेत्रनिहाय झालेला विसर्ग (क्युसेकमध्ये)  

मुळशी ११००, टेमघर ३००, वरसगाव ६००, पानशेत ३६४१, खडकवासला ४२१३, कासारसाई ५६०, कळमोडी २६५, चासकमान २०००, आंध्रा ४६१, नाझरे २४२, गुंजवणी ९३६, भाटघर ५४०१, वीर ७६८५, येडगाव १०००, वडज २३०, डिंभे २१००, चिल्हेवाडी ६३९, विसापूर ४९, उजनी २३३६०.