Wildlife Crop Damage : नेसरी भागात वन्य प्राण्यांचा धुमाकूळ

Kolhapur News : नेसरी विभागातील अर्जुनवाडी, तळेवाडी, तारेवाडी, हडलगे, हेब्बाळ-जळद्याल, लिंगनूर, वाघराळी, बिद्रेवाडी, मांगनूर तर्फ नेसरी येथील शेतकरी गवे, वानर, डुक्कर, हत्ती अन्य वन्य प्राण्यांकडून शेतीचे नुकसान होत असल्याने त्रस्त झाले आहेत.

वन्य प्राण्यांकडून पिकांचे नुकसान होत असल्याने शेतकरी चिंतेत आहेत. अर्जुनवाडी, तळेवाडी, तारेवाडी, हडलगे, मासेवाडी, मांगनूर तर्फ नेसरीच्या डोंगराळ भागात गव्यांचे वास्तव्य आहे. परिसरातील शेतीमधील हातातोंडाशी आलेल्या पिकांचे गव्यांच्या कळपांकडून नुकसान होत आहे.

भात, ऊस, पिके वन्य प्राण्यांकडून फस्त होत आहेत. या पिकांची नुकसान भरपाई देण्यासह बंदोबस्त करण्याची मागणी शेतकऱ्यांमधून होत आहे. अनेक शेतकऱ्यांकडून शेतीचे संरक्षण केले जात आहे. घटप्रभा नदीला मुबलक पाणीसाठा, तारेवाडी, हडलगे, डोंगर भागातील घनदाट झाडीत तर अर्जुनवाडी डोंगराळ भागात बांबूची लागवड केली आहे.

त्या भागात गव्यांचे कळप राजरोस वावरताना दिसतात. काही वेळा हत्तींकडून पिकांचे नुकसान केले जात आहे. शेतात बुजगावणे उभे करणे, कापड बांधणे, वाद्य, फटाके वाजवणे, वेगवेगळे आवाज काढून वन्य प्राण्यांना हुसकावून लावण्याचा प्रयत्न केला जात आहे.

नुकसान टाळण्यासाठी शेतकरी जीव धोक्यात घालून पिकांची राखण करत आहेत. सध्या भात, भुईमूग, नाचणी पिकांकडे गव्यांच्या कळपांनी आपला मोर्चा वळवल्याने शेतकरी हवालदिल झालेत. नुकसानग्रस्त पिकांचे पंचनामे करून भरपाई देण्याची मागणी शेतकऱ्यांकडून होत आहे.