Parbhani News : पंतप्रधान आवास योजना ग्रामीण टप्पा -२ अंतर्गंत घरकुलांचा लाभ प्राधान्याने विधवा, परित्यक्त्या, दिव्यांग महिलांना दिला जाईल. परभणी जिल्ह्यातील एकही पात्र गरजू व्यक्ती या योजनेच्या लाभापासून वंचित राहणार नाही.

परभणी जिल्ह्यात ५२ हजार १७९ घरकुलांचे उद्दिष्ट असून त्यापैकी ४४ हजार ८६१ घरकुलांना मंजुरी देण्यात आली असून २३ हजारांवर लाभार्थ्यांना प्रथम हप्ता वितरित करण्यात आला, अशी माहिती पालकमंत्री मेघना साकोरे- बोर्डीकर यांनी दिली.

पंतप्रधान आवास योजना ग्रामीण टप्पा-२ अंतर्गत जिल्हाधिकारी कार्यालयातील नियोजन सभागृहामध्ये शनिवारी (ता.२२) आयोजित जिल्हास्तरीय कार्यक्रमात त्या बोलत होत्या. यावेळी जिल्हा परिषदेच्या मुख्य कार्यकारी अधिकारी नतीशा माथूर, अतिरिक्त मुख्य कार्यकारी अधिकारी तथा जिल्हा ग्रामीण विकास यंत्रणा प्रकल्प संचालक रश्मी खांडेकर, नरेगा गट विकास अधिकारी जयंत गाडे, एनजीओ सदस्य भरत कच्छवे उपस्थित होते.

पालकमंत्री मेघना साकोरे म्हणाल्या, की पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या मार्गदर्शनात जिल्ह्यातील नागरिकांना विविध घरकुल योजनांच्या माध्यमातून लाभार्थ्यांना घरकूल योजनेचा लाभ देण्यात आला आहे.

दीनदयाळ योजनेच्या माध्यमातूनही जास्तीत जास्त नागरिकांना लाभ मिळवून देण्याच्या सूचनाही त्यांनी यावेळी दिल्या. अत्यंत गरजू व्यक्तीला पहिल्या टप्प्यात प्रधानमंत्री आवास योजनेचा लाभ मिळणे आवश्यक आहे.

चुकीच्या पद्धतीने घरकुलाचा लाभ घेणाऱ्या लाभार्थ्यांची तपासणी करुन त्यांच्यावर कारवाई करण्याच्याही सूचना यावेळी त्यांनी प्रशासनाला दिल्या. नतीशा माथुर म्हणाल्या, की प्रधानमंत्री दिवस योजना ग्रामीण टप्पा -२ अंतर्गत मागील २ महिन्यात जिल्ह्यात ६६६ घरकुलांचे काम पूर्णत्वास गेले.घरकुलांची कामे वेळेत आणि गुणवत्तापूर्ण करावीत.