Solapur News : शेतकऱ्यांच्या प्रगतीसाठी डाळिंब संशोधन केंद्र कायम पुढाकार घेत आले आहे, यापुढेही तो घेऊ, असे मत राष्ट्रीय डाळिंब संशोधन केंद्राचे संचालक डॉ. राजीव मराठे यांनी कारंबा (ता. उत्तर सोलापूर) येथे केले.

राष्ट्रीय डाळिंब संशोधन केंद्राच्या वतीने अनुसूचित जाती प्रवर्गातील शेतकऱ्यांसाठी मोफत विविध प्रकारच्या कृषी निविष्ठांचे वाटप करण्यात आले. त्या वेळी ते बोलत होते. विश्‍वकर्मा सोशल फाउंडेशनच्या साह्याने हा उपक्रम घेण्यात आला.

डाळिंब संशोधन केंद्राचे प्रमुख शास्त्रज्ञ डॉ. संग्राम धुमाळ, वरिष्ठ शास्त्रज्ञ डॉ. शिल्पा परशुरामी, शास्त्रज्ञ रूपा सौजन्य, विश्‍वकर्मा सोशल फाउंडेशनचे अध्यक्ष विनायक सुतार, भाजप युवा मोर्चाचे जिल्हा उपाध्यक्ष संभाजी दडे, सोसायटीचे सदस्य भागवत कत्ते, संजय आदाटे, कृषी सहायक ज्ञानदेव गोडसे, शरीफ शेख, सौ. कमल पाटील, कैलास कांबळे, सुहास भोसले, अनिल सुतार, अमोल सुतार, बाळासाहेब माने, सत्तार शेख, सुखदेव कांबळे, ज्ञानेश्वर कांबळे, राजू कदम, शिवशंकर नारायणकर आदी उपस्थित होते.

डॉ. मराठे म्हणाले, की डाळिंब केंद्राचे कार्यक्षेत्र देशभर आहे. डाळिंबाच्या लागवडीपासून व्यवस्थापनापर्यंत सर्व प्रकारचे तांत्रिक मार्गदर्शन आम्ही करतो, जिल्ह्यासह स्थानिक भागातील शेतकऱ्यांनी कधीही आमच्याकडे यावे, आम्ही वेगवेगळ्या भागात असे उपक्रम राबवतो,

पंतप्रधान मोदी यांनी जाणीवपूर्वक या वर्गातील शेतकऱ्यांसाठी हा उपक्रम राबवण्याचा निर्णय घेतला, आम्ही त्याची अंमलबजावणी करीत आहोत, असे ते म्हणाले. प्रास्ताविक विश्‍वकर्मा सोशल फाउंडेशनचे अध्यक्ष विनायक सुतार यांनी केले. त्यात त्यांनी फाउंडेशनच्या विविध उपक्रमांची माहिती दिली. कार्यक्रमाचे सूत्रसंचालन सुहास भोसले यांनी केले. बाळासाहेब माने यांनी आभार मानले.

उत्तर सोलापुरातील आठ गावांत वाटप

या कार्यक्रमात कारंबा, साखरेवाडी, अकोलेकाटी, गुळवंची, खेड, बीबीदारफळ, नान्नज, राळेरास या गावातील अनुसूचित जाती प्रवर्गातील ४० शेतकऱ्यांना प्रत्येकी सुमारे १५ हजार रुपये किमतीच्या कृषी निविष्ठांचे मोफत वाटप करण्यात आले. त्यात सेंद्रिय तसेच रासायनिक खते, कीडनाशके या कृषी निविष्ठांसह कामगंध सापळ्यांचा समावेश आहे.