Nagar News : जिल्हा बॅंकेच्या वतीने सेवा संस्थांच्या माध्यमातून शेतकऱ्यांना दिलेले कर्ज वेळेत परतफेड करावे. तसे केले नाही, तर हे कर्ज थकबाकीत जाईल. वेळेत परतफेड केलेल्या शेतकऱ्यांनाच शून्य टक्के व्याजदराचा लाभ मिळेल. या योजनेचा लाभ घेण्याचे आवाहन जिल्हा बॅंकेकडून करण्यात आले आहे.

बॅंकेच्या प्रसिद्धिपत्रकानुसार, वेळेत कर्जफेड केले नाही, तर थकबाकीचा व्याजदर लागू होईल. पर्यायाने शेतकरी व सेवा संस्थांही अडचणीत येतील. खरीप कर्जाची वसुली सभासदांनी स्वेच्छेने केल्यास ती स्वीकारली जाईल. अशा सभासदांना शासनाच्या शून्य व्याजदर सवलतीचा लाभ होईल.

पुढील खरीप हंगामासाठी सवलतीच्या व्याजदरात नव्याने पीक कर्ज उपलब्ध होईल. ‘‘सरकारने सहकारी कर्जाच्या व्याजासह पुनर्गठन करणे व शेतीशी निगडित कर्जाच्या वसुलीस स्थगिती दिलेली आहे. त्या अनुषंगाने बँकेच्या संचालक मंडळाची सभा झाली. शासन निर्णयानुसार शेती कर्जाच्या वसुलीस स्थगिती दिली होती.

मात्र आता त्यासंदर्भात शासनाच्या निर्णयाला अनुसरून महाराष्ट्र राज्याचे सहकार आयुक्त व निबंधकांनी परिपत्रकाद्वारे कर्ज वसुली व कर्जाच्या पुनर्गठनाबाबत सविस्तर सूचना दिल्या आहेत. दरम्यान, नव्याने आलेल्या सूचनांनुसार एक एप्रिल २०२३ ते ३० सप्टेंबर २०२३ या दरम्यान कर्जवितरण झाले आहे. अशाच कर्जाच्या वसुलीस स्थगिती देण्यात आली आहे,’’ असे जिल्हा बॅंकेचे अध्यक्ष शिवाजी कर्डिले यांनी सांगितले.

..या कर्जवसुलीला नाही स्थगिती

सहकार आयुक्तांच्या परिपत्रकानुसार खरीप कर्जाच्या व्याख्येत ऊस पीककर्ज, पशुपालन खेळते भांडवली कर्ज, मध्यम मुदत व दीर्घमुदत कर्ज पात्र नाही.