Ahilyanagar News : पारनेर तालुका कृषी उत्पन्न बाजार समितीस गत आर्थिक वर्षात चार कोटी २६ लाख ४० हजार ८७४ रुपयांचे उत्पन्न मिळाले. खर्च वजा जाता बाजार समितीस या आर्थिक वर्षात दोन कोटी आठ लाख ९२ हजार ४१५ रुपयांचा निव्वळ नफा झाला असल्याची माहिती सभापती किसनराव रासकर व माजी सभापती बाबासाहेब तरटे यांनी दिली.

खासदार नीलेश लंके यांच्या गटाच्या ताब्यात बाजार समितीची सत्ता आल्यानंतर खासदार लंके यांच्या मार्गदर्शनाखाली शेतकरी हित जोपासत आम्ही पारदर्शक कारभार सुरू केला आहे. गेल्या आर्थिक वर्षात बाजार समिती आवारात पंधरा लाख ३० हजार २७७ क्विंटल कांद्याची आवक झाली, तसेच १० हजार ४७० क्विंटल सोयाबीनची खरेदी करण्यात आली.

गत आर्थिक वर्षात बाजार समितीची सुमारे ४२६ कोटींची उलाढाल झालेली आहे. काटकसरीने कारभार करत कर्मचाऱ्यांचे वेतन व आस्थापनेवरील खर्च वजा जाता बाजार समितीस सुमारे दोन कोटी आठ लाख ९२ हजार ४१५ रुपयांचा विक्रमी निव्वळ नफा झाला असल्याचेही रासकर व तरटे यांनी सांगितले.

बाजार समितीने नफ्याची रक्कम खात्यावर शिल्लक न ठेवता संचालक मंडाळाच्या ठरावानुसार ती रक्कम बँकेत कायम ठेव म्हणून जमा केली आहे. सध्या बाजार समितीची कायम ठेव तीन कोटी नऊ लाख ६० हजार रुपये असल्याचेही ते म्हणाले. बाजार समितीत २०२२-२३ या आर्थिक वर्षात सुमारे ११ लाख ९० हजार, तर २०२३-२४ या आर्थिक वर्षात १७ लाख १४ हजार क्विंटल कांदा विक्रीसाठी शेतकऱ्यांनी आणला.

खासगी व्यापाऱ्यांना कांदा विक्री केल्यास शेतकऱ्यांची फसवणूक होण्याची, तर कधी कधी पैसे बुडण्याची शक्यताही नाकारता येत नाही, तसेच जर सरकारने अनुदान देण्याचे ठरविले, तर बाजार समितीत विक्री केलेल्या कांद्यालाच अनुदान मिळते. म्हणून शेतकऱ्यांनी कांदा बाजार समितीतच विक्रीसाठी आणावा, असे आवाहनही सभापती रासकर यांनी केले.