Parliament News: आजपासून (ता.२१) संसदेचे पावसाळी अधिवेशन सुरू झाले असून अधिवेशन २१ ऑगस्टपर्यंत चालेल. या काळात २१ बैठका होणार असून, सरकार ८ नवीन विधेयके सादर करणार आहे. पंतप्रधान नरेंद्र मोदी यांनी अधिवेशनाला ‘विजय उत्सव’ संबोधत भारतीय सैन्याच्या ‘ऑपरेशन सिंदूर’च्या यशस्वी कारवाईचे कौतुक केले.

तसेच, नक्षलवादमुक्त झालेले जिल्हे, देशाची आर्थिक प्रगती आणि भारतीय अंतराळवीर शुभांशु शुक्ला यांच्या आंतरराष्ट्रीय अंतराळ स्थानकावरील यशस्वी मोहिमेबद्दल अभिमान व्यक्त केला.संसदीय कामकाज मंत्री किरेन रिजिजू यांनी दिलेल्या माहितीनुसार स्वातंत्र्यदिनामुळे १३ आणि १४ ऑगस्टला बैठका होणार नाहीत.

यंदा अधिवेशनात २१ बैठका होतील आणि सरकार ८ नवीन विधेयके सादर करेल. यापूर्वी हे अधिवेशन १२ ऑगस्टला संपणार होते, पण आता ते एका आठवड्याने वाढवण्यात आले आहे.पंतप्रधान नरेंद्र मोदी यांनी अधिवेशनापूर्वी प्रसारमाध्यमांशी संवाद साधला. “मॉन्सून हे नवीनतेचे प्रतीक आहे. यंदा पाऊस शेतीसाठी खूपच फायदेशीर आहे.

गेल्या १० वर्षांत जेवढा पाण्याचा साठा झाला, त्याच्या तिप्पट साठा यावर्षी झाला आहे. हे शेतकरी आणि देशाच्या अर्थव्यवस्थेसाठी खूप महत्त्वाचे आहे.” असे ते म्हणाले.पंतप्रधानांनी या अधिवेशनाला ‘विजय उत्सव’ असे संबोधले. भारतीय सैन्याच्या ‘ऑपरेशन सिंदूर’च्या यशस्वी कारवाईबद्दल त्यांनी अभिमान व्यक्त केला. “आपल्या सैन्याने २२ मिनिटांत दहशतवाद्यांचे अड्डे उद्ध्वस्त केले.

‘मेड इन इंडिया’च्या लष्करी ताकदीने जगाचे लक्ष वेधले आहे,” असे ते म्हणाले. खासदारांनी या अधिवेशनात भारताच्या संरक्षण क्षमतेला बळ देणारे विचार मांडावेत, असे आवाहन त्यांनी केले.मोदींनी माओवाद आणि नक्षलवादाविरुद्धच्या कारवाईचेही कौतुक केले. “लाल कॉरिडॉर आता हिरव्या विकास क्षेत्रात बदलत आहे. अनेक जिल्हे नक्षलवादमुक्त झाले आहेत. आपले संविधान विजयी होत आहे,” असे ते म्हणाले.

आर्थिक प्रगतीबद्दल बोलताना मोदी म्हणाले, “११ वर्षांपूर्वी भारत ‘फ्रॅजाइल फाइव्ह’ मध्ये होता. आता तो जगातील तिसऱ्या क्रमांकाच्या अर्थव्यवस्थेकडे वाटचाल करत आहे.” तसेच, भारतीय अंतराळवीर शुभांशु शुक्ला यांच्या अंतराळ प्रवासाचा उल्लेख करत ते म्हणाले, “यावर्षी भारताचा तिरंगा आंतरराष्ट्रीय अंतराळ स्थानकावर फडकला. हा प्रत्येक भारतीयासाठी अभिमानाचा क्षण आहे.”