Hingoli News : जिल्ह्यात सर्वत्र मोठ्या प्रमाणात पाऊस होऊन शेती पिकाचे, पशुधन, घरे, शाळा, अंगणवाडी, प्राथमिक आरोग्य केंद्र, उपकेंद्राचे मोठ्या प्रमाणात नुकसान झाले आहे. नुकसानीचे तत्काळ पंचनामे सुरू करावेत, असे निर्देश जिल्हाधिकारी अभिनव गोयल यांनी सोमवारी (ता. २) सर्व संबंधित विभागाच्या अधिकाऱ्यांना दिले.

गुगलमीटद्वारे ऑनलाइन बैठकीत बोलतहोते. यावेळी जि. प. चे प्रभारी मुख्यकार्यकारी अधिकारी अनुप शेंगुलवार, अप्पर जिल्हाधिकारी खुशालसिंह परदेशी, निवासी उपजिल्हाधिकारी अभिमन्यू बोधवड, उपजिल्हाधिकारी अनिल माचेवाड, जिल्हा पुरवठा अधिकारी राजेश पुंजल, उपविभागीय अधिकारी, तहसीलदार, गटविकास अधिकारी, विविध विभागाचे अधिकारी उपस्थित होते.

गोयल म्हणाले, की जिल्ह्यातील काही गावामध्ये नागरिक पुराच्या पाण्यात अडकून पडले. त्यासर्वांना सुरक्षितस्थळी हलविण्यात आले असून त्यांच्या अन्न-पाणी आणि निवाऱ्याची सोय करावी. पाऊस आणि पुराच्यापाण्याने जिल्ह्यातील नुकसान झालेल्या भागातील शेती, घरे, जनावरांचे तातडीने पंचनामे सुरु करावेत.

अतिवृष्टीमध्ये जीवित ववित्तहानीची परिपूर्ण माहिती तयार करावी. मदतीची आवश्यकता असलेल्या ठिकाणी तातडीने मदत पाठविण्याची व्यवस्था करावी. महावितरण विभागाने खंडीत झालेला वीज पुरवठा सुरळीत करण्याची प्राधान्याने आणि तत्काळ कार्यवाही करावी. वीज उपकेंद्र, शाळा, अंगणवाडी, प्राथमिक आरोग्य केंद्र, उपकेंद्रामध्ये पाणी शिरले आहे. त्याठिकाणचे पाणी काढून देण्याची व्यवस्था करावी, असे निर्देश गोयल यांनी दिले.