Pune News : भाताचे आगर म्हणून ओळखल्या जाणाऱ्या खेड तालुक्याच्या पश्चिम पट्ट्यात भातलागवडी अंतिम टप्प्यात आल्या आहे. दमदार पावसामुळे बळीराजा सुखावला आहे. भातखाचरांमध्ये पाणी साचले असल्याने लागवड झालेली भातरोपे तरारली आहेत.

खेड तालुक्याच्या पश्चिम पट्ट्यात वाडा, तिफनवाडी, वाळद, आव्हाट, खरोशी, धुवोली, मंदोशी, टोकावडे, भोरगिरी या सह सर्वच भागात खरीप हंगामात जवळपास सर्वच ठिकाणी भातलागवड केली जाते. या पट्ट्यात ३३०० हेक्टरवर भाताची लागवडी होते.

चालू वर्षी सुरवातीला वरुणराजाने चांगली हजेरी लावल्याने शेतकऱ्यांनी वेळेवर भातरोपे तयार करण्यासाठी साळीची पेरणी केली. भातरोपे तयार झाल्यावर पावसाने ओढ दिल्याने भातलागवडी रखडल्या.

मात्र त्यानंतर कमी अधिक पडणाऱ्या पावसाने भात लागवडींना वेग आला. त्यातच गेल्या पंधरा दिवसांपासून दमदार व संततधार पाऊस कोसळल्याने भातलागवडी वेगाने सुरू होत्या.

काहीशी उसंत मिळणार

सद्यःस्थितीत खेड तालुक्याच्या सर्वच भागात भात लागवडींना अंतिम टप्प्यात आल्या असून लागवडीसाठी भातखाचरांमध्ये ट्रॅक्टरबरोबरच बैलांचा वापर होत असून भातलागवडी झाल्यानंतर बळीराजाला काहीशी उसंत मिळणार आहे.