Wangaon News : पालघर जिल्ह्यात सर्वत्र ठिकाणी सध्या भात कापणी कामाला सुरुवात होण्याच्या वाटेवर आहे. नवरात्रोत्सवात सध्या खरिपातील हळवे भातपीक कापणीला तयार होत असून पूर्वतयारीला शेतकरी वर्ग लागला आहे. नवरात्रोत्सव संपण्याच्या आधी हळवे भात कापून घेण्याचा प्रयत्न शेतकरी वर्गाचा आहे.

सध्या हळवी भातशेती कापणीला तयार झाली आहे. काही ठिकाणी भात कापणीला सुरुवातदेखील करण्यात आली आहे. परतीच्या पावसाने यंदा काही भागात भात शेतीचे नुकसान झाल्याचे आढळून आले, तरीही यंदा भात शेतीपासून चांगले उत्पादन मिळण्याची आशा आहे, असे शेतकरी सांगतात. गेल्या हंगामापेक्षा यंदा सरासरीपेक्षा जास्त प्रमाणात भातलागवड झाली आहे.

यंदा सप्टेंबरच्या शेवटच्या आठवड्यात पावसाने उग्ररूप धारण केल्यामुळे कापणीला तयार झालेली भातशेती जमीनदोस्त झाली आहे. वाऱ्याचा वेगदेखील जास्त असल्याने भातशेती खाचरात आडवी झाली आहे. हातातोंडाशी आलेले पीक निघून जाण्याची भीती शेतकऱ्यांकडून वर्तविण्यात आलेली आहे.

सरकारने नुकसानीचा गांभीर्याने विचार करून त्वरित पंचनामे करावेत आणि न्याय मिळवून द्यावा, असे शेतकरी सांगत आहेत. शेतकऱ्यांनी बुरशीजन्य रोग तसेच अळ्या, किडी यांच्याबाबतीत दक्ष राहावे. असे कृषी विभागाच्या वतीने सांगण्यात येत आहे.

लोहारांच्या दुकानात गर्दी

ग्रामीण भागातील शेतकरी विळ्याच्या सहाय्याने भात कापणी करतात. ग्रामीण भागातील अनेक शेतकरी जुने ठेवणेतील विळे, कोयते लोहाराच्या दुकानात आणून देत असून त्याला पुन्हा धार लावून घेत आहेत. या कामासाठी अनेक गाव-खेड्यांतून शेतकरी वर्ग लोहाराच्या दुकानात गर्दी करीत आहेत.