Kolhapur News : वरुणराजाच्या कृपादृष्टीमुळे कळंबा शेती गटांतर्गत चाळीस गावांमध्ये यंदाच्या खरीप हंगामात भाताचे विक्रमी उत्पादन होणार असल्याचे चित्र आहे. १ हजार ७५६ हेक्टरमध्ये भात पिके तरारली आहेत.

दरम्यान शेतकऱ्यांनी भात कापणीला सुरुवात केली आहे. पावसाने शिवारात पाणी साचले असून चिखल गुट्ट्यासारखी अवस्था झाली आहे. मजुरांची टंचाई व पावसाने भाताचे नुकसान होऊ नये म्हणून शेतकरी कुटुंबासमवेत राबताना दिसत आहेत.

कळंबा, कात्यायनी, हणबरवाडी, गिरगाव, पाचगाव, कंदलगाव, खेबवडे, जैताळ, चुये, कावणे, निगवे, निगवे खालसा, कणेरी, कणेरीवाडी, मोरेवाडी, उजळाईवाडीसह चाळीस गावांमध्ये शेतकऱ्यांनी १ हजार ७५६ हेक्टरमध्ये भात पिकाची लागवड केली आहे.

पिकांची उगवणूक चांगली होऊन व उत्पन्न वाढीसाठी घरचेच संकरित बियाणे पेरणीसाठी वापरले आहे. अनेक ठिकाणी भात पीक काढणीला व फुलोऱ्यात आले आहे. दरम्यान चार दिवस पावसाने जोरदार हजेरी लावल्यामुळे शेतात पाणी साचले आहे. कृषी विभागाने बांधावर जाऊन खरीप हंगामात पेरणीसाठी संकरित घरचेच बियाणे वापरावे यासाठी प्रबोधन केले. त्यामुळे यंदा भाताचे विक्रमी उत्पादन होणार असल्याचे दिसत आहे.

पंधराहून अधिक वाण

कळंबा शेती गटाअंतर्गत यंदा हंगामात जया, रत्नागिरी २४, कोलम, शुभांगी, आर वन, सह्याद्री, बासमती, वाडाकोलम, फुलेराधा, कर्जत चार, अंबिका, तेरणा, कर्जत तीन, आरपी ४/१४, वायएसआर, सुवर्णा, दारणा, बासमती ३७०, कुसा बासमती, इंद्रायणी, भोगावती, फुले समृद्धी यासह पंधराहून अधिक जातीचे संकरित बियाणे शेतकऱ्यांनी वापरले आहे.

सेंद्रिय खतांचा वापर

शेतकऱ्यांनी यंदा शेत शिवारात शेळ्या-मेंढ्या बसवून लेंडीखत मिळवले. शेणखताचा वापर केला आहे. त्याचबरोबर कळंबा तलावातील गाळ शेतात पसरला. त्यामुळे खरिपात भातासह अनेक पिकांची वाढ चांगली झाली आहे.