Bhandara News : राज्य शासनाने धान उत्पादकांना दिलासा देत हमीभावाच्या जोडीला हेक्‍टरी वीस हजार रुपये देण्याची घोषणा केली होती. त्यानुसार भंडारा जिल्ह्यातील शेतकऱ्यांसाठी २१३ कोटी १२ लाख १५ हजार २०० रुपयांचा निधी प्राप्त झाला आहे. लवकरच ही रक्‍कम बोनससाठी पात्र शेतकऱ्यांच्या खात्यात जमा केली जाणार आहे.

पूर्व विदर्भातील सहा पैकी पाच जिल्ह्यात धानाची लागवड होते. सुमारे साडेसहा ते सात लाख हेक्‍टरवर धान लागवड होते. पाण्याची सोय असलेले शेतकरी उन्हाळी धानाची लागवड करतात. मात्र गेल्या काही वर्षांत धानाला अपेक्षित दर मिळत नसल्यामुळे शेतकरी आर्थिक अडचणीत सापडले आहेत. त्यांना दिलासा देण्याच्या उद्देशाने शासनाकडून हमीभावाच्या जोडीला प्रति हेक्‍टर बोनसची घोषणा केली जाते.

या वर्षी दोन हेक्‍टरच्या मर्यादेत प्रती हेक्‍टर वीस हजार रुपयांच्या बोनस देण्याचे नागपूर येथील हिवाळी अधिवेशन काळात जाहीर करण्यात आले. डिसेंबर २०२२४ मध्ये पार पडलेल्या अधिवेशनानंतर जूनपर्यंत देखील शासनाकडून यासाठी निधीची तरतूद करण्यात आली नाही. त्यामुळे गेल्या सहा महिन्यांपासून धान उत्पादक शेतकरी बोनसच्या प्रतीक्षेत होते.

या संदर्भाने अनेकदा आंदोलनाचा मार्गही शेतकऱ्यांनी पत्करला. परंतु त्याची कोणतीच दखल घेण्यात आली नाही. दरम्यान खासदार प्रफुल्ल पटेल यांनी धान उत्पादकांच्या अडचणी उपमुख्यमंत्री अजित पवार यांच्याकडे मांडल्या. त्याची दखल घेत भंडारा, गोंदिया जिल्ह्यासाठी निधीची उपलब्धता करण्यात आली आहे.

भंडारा जिल्ह्याला धान बोनसपोटी २१३ कोटी १२ लाख १५ हजार २०० रुपयांचा निधी प्राप्त झाला आहे. जिल्हा मार्केटिंग विभागाच्या खात्यात ही रक्‍कम जमा झाली आहे. धान खरेदी केंद्रांकडून शेतकऱ्यांच्या पावत्या प्राप्त होताच बोनसची रक्‍कम ऑनलाइन पद्धतीने शेतकऱ्यांच्या खात्यात जमा केली जाणार असल्याची माहिती जिल्हा पणन अधिकारी एस. बी.चंद्रे यांनी दिली. कोल्हापूर नंतर बोनसच्या माध्यमातून सर्वाधिक निधी मिळालेला जिल्हा भंडारा असल्याचेही सांगण्यात आले.

धानाला हवा तीन हजाराचा दर

धानाला यंदाच्या हंगामात २३६९ रुपयांचा हमीभाव निश्‍चीत करण्यात आला आहे. परंतु हा दर अत्यल्प असल्याचे सांगत किमान तीन हजार रुपयांचा दर मिळावा, अशी मागणी शेतकऱ्यांची आहे.