Vaibhavwadi News: जिल्ह्यातील भात आणि नाचणी रोप लागवड पूर्ण झाली आहे. ५४ हजार हेक्टरवर भातरोप तर ३ हजार हेक्टरवर नाचणी रोप लागवड करण्यात आली आहे. या वर्षी भातपिकाच्या क्षेत्रात ८ हजार हेक्टरची घट झाली आहे. दरम्यान, जिल्ह्यात शुक्रवारी (ता. ८) सकाळपासून सुरू झालेली पावसाची रिपरिप दुपारपर्यंत कायम होती.

जिल्ह्यात यावर्षी ५ हजार ४०० हेक्टरवर भात रोपवाटिका तर २५० हेक्टरवर नाचणी रोपवाटिका तयार करण्यात आल्या होत्या. जिल्ह्यात २० जूनपासून भातरोप पुनर्लागवडीच्या कामांना सुरुवात झाली. जुलैच्या पहिल्या आठवड्यापर्यंत चांगला पाऊस झाल्यामुळे लागवडीला गती मिळाली.

परंतु त्यानंतर काही दिवस पावसाने उघडीप दिली. त्यामुळे भातरोप लागवड रखडली होती. १० जुलैनंतर पुन्हा दमदार पाऊस सुरू झाला. त्यामुळे भातरोप लागवड गतीने सुरू झाली. जिल्ह्यातील भातरोप लागवडीचे काम पूर्ण झाले असून जिल्ह्यात ५४ हजार हेक्टरवर भातपीक लागवड झाली आहे. गेल्या वर्षीच्या तुलनेत ८ हजार हेक्टरने लागवड क्षेत्र घटले आहे. 

नाचणी रोप लागवड २० जुलैनंतर सुरू झाली. जोरदार पावसामुळे काही दिवस लागवड करताना अडचणी निर्माण झाल्या. परंतु गेले काही दिवस पावसाच्या हलक्या सरी असल्यामुळे लागवडीला गती मिळाली. जिल्ह्यात ३ हजार हेक्टर क्षेत्रावर नाचणी लागवड पूर्ण झाली आहे.