Sindhudurg News : सततच्या पावसामुळे नुकसान झालेल्या तीन हजार भातपीक उत्पादकांनी पीकविमा कंपनीकडे सूचना नोंदविल्या आहेत. या नुकसानीचे कृषी विभाग, पीकविमा प्रतिनिधीकडून पंचनामे सुरू करण्यात आले आहेत.

जिल्ह्यात ऑक्टोबरच्या पहिल्या आठवड्यापासून विजांच्या कडकडाटासह मुसळधार पाऊस सुरू आहे. काही भागांत ढगफुटीसदृश पाऊस पडत आहे. काही भागांत पूरसदृशस्थिती निर्माण होऊन नदीलगतच्या भातपिकांमध्ये दगडमातीचा गाळ साचला होता. त्यानंतर आतापर्यंत सतत पाऊस पडत आहे.

या पावसामुळे जिल्ह्यातील भातपिकांचे मोठे नुकसान झाले आहे. महिनाभरापूर्वी परिपक्व झालेल्या भातपिकांचे मोठे नुकसान झाले आहे. जिल्ह्यात १० ते १२ हजार हेक्टर भातपिकांचे नुकसान झाल्याचा प्राथमिक अंदाज आहे.

यातील ३ हजारांहून अधिक शेतकऱ्यांनी पीकविमा कंपनीकडे नुकसानीच्या सूचना नोंदविल्या आहेत. सूचना नोंदविल्यानंतर पीकविमा प्रतिनिधी आणि कृषी विभागाकडून नुकसानीचे पंचनामे सुरू केले आहेत. दरम्यान, नुकसानीचे क्षेत्र वाढण्याची शक्यता आहे.