Paddy Crop Damage : रायगडमध्ये भातपिकाचे ३७८४ हेक्‍टर क्षेत्र बाधित

Alibaug News : पंधरा दिवसांपासून दररोज सायंकाळी कोसळणाऱ्या परतीच्या पावसाचा भातशेतीला मोठा फटका बसला आहे. कृषी विभागाच्या प्राथमिक अंदाजानुसार, रायगड जिल्ह्यातील ९५५ महसुली गावे बाधित झाली आहेत.

आतापर्यंत १०,५९१ शेतकऱ्यांच्या मालकीच्या तीन हजार ७८४ हेक्टर क्षेत्राचे पंचनामे झाले आहेत. परतीचा पाऊस अद्याप थांबण्याचे नाव घेत नसल्याने कृषी विभागाने वर्तविलेल्या अंदाजित नुकसानीत वाढ होण्याची शक्यता आहे.

खरीप हंगामातील भातशेती कापण्यासाठी तयार असतानाच, परतीचा पाऊस सक्रिय झाल्‍याने हातातोंडाशी आलेल्‍या पिकाची नासाडी झाली. दररोज सायंकाळी विजांच्या कडकडाटासह येणाऱ्या वादळी पावसामुळे शेतीचे अतोनात नुकसान होत आहे.

शेतीत पाणी साचत असल्‍याने भातपीक कुजणे, कोंब फुटणे, कीड प्रादुर्भाव आदी संकटांना बळीराजाला तोंड द्यावे लागत आहे. जिल्ह्यातील सर्वच तालुक्यांतील पिकाला पावसाचा फटका बसल्‍याचा अंदाज कृषी विभागाने वर्तवला आहे.

यंदा सुरुवातीपासून समाधानकारक पाऊस झाला आहे. त्यामुळे भातपीक चांगले बहरले असताना परतीच्या पावसाने शेतकऱ्यांची चिंता वाढवली आहे. कापणी लांबणीवर पडत असल्याने जंगली पशु-पक्ष्यांकडूनही पिकाची नासधूस होत आहे. अवघ्‍या काही दिवसांवर दिवाळी सण आला असून कापणी रखडल्‍याने शेतकऱ्यांची दिवाळी भातपिकाच्या चिंतेत जाण्याची शक्‍यता वर्तवली जात आहे.

कापणीच्या वेळी शेतात पाणी असल्याने कापलेला कडबा व्यवस्थित ठेवता येत नाही. भाताच्या लोंब्‍या पाण्यात भिजल्याने दाणा खराब होतो, त्याचबरोबर चिखलातून भातकापणी करण्यासाठी जादा मनुष्यबळाची गरज भासते. अशा अनेक अडचणींना शेतकऱ्यांना तोंड द्यावे लागत असून आर्थिक गणितही बिघडले आहे.

नुकसानीचा आढावा

तालुका बाधित क्षेत्र शेतकरी गावे

पेण ९८.६० २९० ८३

मुरूड १५.३० ४०४

खालापूर ३६९.५० ६८५ ८९

कर्जत १८५८.४५ ४३८५ २०६

पनवेल ७८.४० २१४ ५१

उरण १०२.९० ३१३ २०

माणगाव ५६४.२० १५७२ १५४

रोहा १२२.४५ ४९९ ४९

सुधागड १८.२० ४२ २३

तळा ४२.४० १७२ ३६

महाड ४०५.८२ १९१३ १३९

पोलादपूर ७५.७७ ३७१ ६६

म्हसळा ३१.०० ८५ २८

श्रीवर्धन १.७१ १० ७

एकूण ३७८४.७० १०५९१ ९५५