Solapur News: शक्तिपीठ महामार्गाच्या मोजणीसाठी तुळजापूर तालुक्याचे प्रांताधिकारी व तामलवाडी पोलिस स्टेशनचे पोलिस अधिकारी व कर्मचारी असा फौजफाटा घेऊन बार्शी तालुक्यातील शेळगाव (आर) शिवारात व वाणेवाडी येथील शेतीची मोजणी करण्यासाठी दाखल झाले, परंतु याला बाधित शेतकऱ्यांकडून तीव्र विरोध करण्यात आला. त्यानंतर पोलिस प्रशासनाने बळाचा वापर करत त्यांना ताब्यात घेतले. या कारवाईवर शेतकऱ्यांनी तीव्र शब्दात आक्षेप नोंदवला आहे.

या कारवाईवेळी संतप्त झालेल्या शेतकऱ्यांनी ‘एकच जिद्द शक्तिपीठ रद्द’ अशी घोषणाबाजी केली. यामुळे प्रशासनाला शेतकऱ्यांच्या रोषाला सामोरे जावे लागले. या वेळी शेतकऱ्यांनी वाढीव मोबदला नको, तर शक्तिपीठ महामार्ग रद्द झालाच पाहिजे, अशी भूमिका मांडली. पोलिस प्रशासनाने बळाचा वापर करून गणेश घोडके, हनुमंत जाधव, अभिजित देशमुख, सुभाष जाधव, दिलीप शिरसाट, भीमाशंकर बादगुडे या शेतकऱ्यांना ताब्यात घेतले.

जमीन मोजणी स्थळावरून शेतकरी हटण्यास तयार नसून त्यांचा विरोध कायम आहे. पोलिस प्रशासन अजून फौज मागवण्याच्या तयारीत असून प्रकरण चिघळण्याची शक्यता आहे. धाराशिव जिल्ह्यातील खुटेवाडी व वाणेवाडी परिसरांत तुळजापूरचे प्रांताधिकारी, तहसीलदार आणि तामलवाडी पोलिस स्थानकाचे अधिकारी व ३० पोलिस कर्मचारी जमीन मोजणीसाठी व रेखांकन करण्यासाठी आले होते. परंतु तेथेही शक्तिपीठ बाधित शेतकऱ्यांनी विरोध केला.