Nashik News : ‘‘उद्योजकीय दृष्टिकोन खूप आवश्‍यक आहे. तो नसेल तर कोणत्याही व्यवसायाची वाताहात होते. काळाची पावले ओळखून स्वत:ला बदलणे गरजेचे असते. ‘सह्याद्री’च्या शेतकऱ्यांनी त्या दिशेने पाऊल टाकले आहे, हे कौतुकास्पद आहे,’’ असे प्रतिपादन ‘मगरपट्टा सिटी ग्रुप ऑफ कंपनीज’चे व्यवस्थापकीय संचालक सतीश मगर यांनी केले.

मोहाडी (ता. दिंडोरी) येथील ‘सह्याद्री फार्म्स''च्या प्रांगणात मंगळवारी (ता. २६) ‘सह्याद्री फार्म्स’ची १३ वी वार्षिक सर्वसाधारण सभा झाली. या वेळी ‘मगर पट्टा सिटी-शेतकऱ्यांच्या शाश्‍वत समृद्धीचा संघटित प्रवास’ या विषयावर मगर यांनी मार्गदर्शन केले. ‘सह्याद्री फार्म्स’चे अध्यक्ष व व्यवस्थापकीय संचालक विलास शिंदे, संचालक डॉ. क्षमा फर्नांडिस, अजहर तांबुवाला, कैलास माळोदे, रामदास पाटील, आदी उपस्थित होते.

मगर म्हणाले, ‘‘शेतकऱ्यांची सामूहिक शक्ती एकत्र आली, की काय चमत्कार होऊ शकतो, याचे ‘सह्याद्री’ एक उदाहरण आहे. ‘सह्याद्री’कडे १९ हजार शेतकऱ्यांची संघटित शक्ती ही मोठी ताकद आहे. तुमची स्वत:ची एक अंतर्गत शिस्तबद्ध, दर्जेदार व्यवस्थापन यंत्रणा आहे. अनावश्‍यक राजकारणापासून तुम्ही कोसो दूर आहात. हाच तुमचा सगळ्यात मोठा गुण आहे. या फायद्याचा तुम्ही जास्तीत जास्त उपयोग करून घ्यावा.

जे जगात कुणी केले नाही ते ‘सह्याद्री’च्या शेतकऱ्यांनी करून दाखविले आहे. तुम्ही इतके करू शकला आहात, तर तुम्ही अजून खूप काही करू शकता, यावर विश्‍वास ठेवा. पुढच्या अनेक पिढ्यांसाठी मार्ग तयार झाला आहे. ‘सह्याद्री’मध्ये स्त्रिया मोठ्या संख्येने सभासद आहेत, हे विशेष कौतुकास्पद आहे.

जोपर्यंत घर सक्षम होत नाही, तोपर्यंत समाज सक्षम होत नाही.’’ श्री. शिंदे यांनी प्रास्ताविकात ‘सह्याद्री फार्म्स’च्या मागील १२ वर्षांतील वाटचालीचा आलेख मांडला. ते म्हणाले, ‘‘शेतकरी उत्पादक कंपनी म्हणून प्रारंभ करताना अनेक आव्हानांतून जावे लागले. मात्र मागील १२ वर्षे एक स्पष्ट दिशा ठेवून सर्वांच्या एकत्रित प्रयत्नांतून ‘सह्याद्री’ची ओळख बनत गेली. त्यातूनच ‘सह्याद्री’ने २०२२-२३ अखेर वार्षिक उलाढालीचा १ हजार ७ कोटींचा पल्ला गाठला आहे.’’

...हे ठरले ‘सह्याद्री फार्मर ऑफ द इयर’

‘सह्याद्री फार्म्स‘तर्फे दरवर्षी उत्कृष्ट उत्पादन घेणाऱ्या शेतकरी सभासदास एक लाख रुपये धनादेशासह ‘सह्याद्री फार्मर ऑफ द ईयर’पुरस्काराने सन्मानित केले जाते. या वर्षी हा पुरस्कार कुर्णोली येथील यादव संधान, शंकर संधान व विंचूर गवळी येथील नर्मदाबाई गवळी, विलास गवळी यांना प्रदान करण्यात आला.