Nagpur News: ‘‘भुईमूगच नाही, तर आमच्या कुटुंबाचे वर्षभराचे स्वप्नसुद्धा वाहून गेले,’’ अशा शब्दांत पाणावलेल्या डोळ्यांनी बारवा (ता. मानोरा) येथील इंदल पवार या शेतकऱ्याने आपली व्यथा व्यक्त केली. इंदल पवार यांचा मुलगा गौरव यांनी मानोरा बाजार समितीत गुरुवारी (ता.१५) भुईमूग विक्रीसाठी आणले होते. या वेळी अचानक आलेल्या पावसात त्यांच्या भुईमूग शेंगा वाहून गेल्या. या विषयावर त्यांच्याशी संवाद साधण्याचा प्रयत्न केला असता त्यांनी ही प्रतिक्रिया दिली.

घरी अठरा विश्व दारिद्र्य आणि उपजीविकेसाठी पाच एकर शेती हेच एकमेव साधन. यंदा त्यांनी तीन एकरांत भुईमूग पेरला होता. मात्र नैसर्गिक संकटाने एकरी दीड क्विंटल एवढी उत्पादकता मिळाली. यापैकी एका ट्रॅक्टर भरून भुईमूग त्यांनी मानोरा बाजार समितीत विक्रीला आणला होता. बाजार समिती यार्डात टीन शेड लहान असल्याने त्यांनी भुईमूग शेंग आवारात उघड्यावर टाकली होती. मात्र शेंगेची विक्री होण्याआधीच अचानक पावसाला सुरुवात झाली.

पावसाचा जोर इतका होता की ६० ते ७० टक्के भुईमूग पावसाच्या पाण्यासोबत वाहून गेला. गौरव याने वाहून जाणाऱ्या शेंगा वाचविण्याचा प्रयत्न केला, परंतु त्यात त्याला यश आले नाही. एक क्विंटलपर्यंत भुईमूग वाहून गेला. तसेच उर्वरित भुईमूगही भिजल्याने विक्री झाली नाही. बाजार समितीमध्ये उपस्थित अनेकांनी या घटनेचे मोबाइलमध्ये चित्रीकरण केले, परंतु एकजणही गौरव यांच्या मदतीला आला नाही. झालेल्या नुकसानीची दखल घेत बाजार समिती प्रशासन व शासनाने भरपाई द्यावी, अशी मागणी या कुटुंबीयांनी केली आहे.

पवार कुटुंबामध्ये आजोबा तुळशीराम मोहन पवार, आजी शशिकला, इंदल पवार, पत्नी प्रमिला, मुलगा राहुल गौरव अशा सहा जणांचा समावेश आहे. त्यातच आजोबा तुळशीराम कॅन्सरग्रस्त असून. त्यांच्या उपचार सुरू आहेत, अशी माहिती गौरव यांनी दिली.

या प्रकरणी मदत मिळावी, अशी मागणी शेतकऱ्याने केली आहे. दरम्यान, या प्रकरणाची दखल घेत केंद्रीय कृषी मंत्री शिवराजसिंह चौहान यांनी शेतकऱ्याशी संपर्क साधून मदत करण्याबाबत आश्‍वासन दिले, अशी माहिती मुलगा गौरव इंदल पवार यांनी दिली.