Panchaganga Pollution : पंचगंगा नदी प्रदूषणाच्या स्थितीची पाहणी करण्यासाठी कोल्हापूर व इचलकरंजी महापालिका व करवीर, इचलकरंजी उपविभागीय अधिकाऱ्यांचे प्रतिनिधी उपस्थित नव्हते. त्यामुळे प्रदूषण नियंत्रण मंडळाने आयोजित केलेली पाहणी रद्द करण्यात आली. आज (ता. १४) सकाळी अकरा वाजता सर्व प्रतिनिधींच्या उपस्थितीत पाहणी केली जाणार आहे.

याबाबत प्रजासत्ताक सामाजिक संस्थेचे दिलीप देसाई यांनी प्रदूषण नियंत्रण मंडळाला पत्र दिले होते. त्यामध्ये नदी प्रदूषण रोखण्यासाठी उच्च न्यायालयाने साडेनऊ वर्षांपूर्वी देखरेख समिती नियुक्त केली होती. पुणे विभागीय आयुक्तांच्या अध्यक्षतेखालील ही समिती अस्तित्वात होती.

या कालावधीत समिती, जिल्हाधिकारी, प्रदूषण नियंत्रण मंडळाच्या कार्यालयाशी अनेकवेळा पत्रव्यवहार केला. नदी प्रदूषणाबाबत फारशी प्रगती झाल्याचे दिसून येत नाही. साडेनऊ वर्षांत देखरेख समितीने कोणत्या कामावर देखरेख केली, प्रदूषण रोखण्याचे कोणते काम पूर्ण झाले, याबाबत अभ्यास होणे गरजेचे आहे.

ते पंचगंगा नदीच्या अस्तित्वासाठीही गरजेचे आहे. त्यामुळे पंचगंगा नदीची आजची स्थिती, मिसळणारे नाले, उपाययोजना आदी बाबींची पाहणी करून अहवाल न्यायालयासमोर जाणे आवश्यक आहे. त्यासाठी संयुक्त पाहणी व्हावी, अशी मागणी केली होती.

पाहणीसाठी जात असताना महापालिका व उपविभागीय अधिकाऱ्यांचे प्रतिनिधी उपस्थित नसल्याने देसाई यांनी अशी पाहणी अमान्य केली. त्यामुळे प्रदूषण नियंत्रण मंडळाचे प्रादेशिक अधिकारी जगन्नाथ साळुंखे यांनी दोन्ही महापालिका व उपविभागीय अधिकाऱ्यांना उद्याच्या पाहणीस उपस्थित राहण्याचे आदेश दिले.