Amravati News : विमा परताव्याच्या अटींमध्ये फळगळती हा निकष समाविष्ट नसल्याने आंबिया बहरातील संत्रा उत्पादकांना भरपाई मिळणार नाही, हे स्पष्ट झाले आहे. अमरावती जिल्ह्यात वरुड, मोर्शी, अचलपूर, चांदूरबाजार, तिवसा या तालुक्यांसह इतर ठिकाणी ७० हजार हेक्टर क्षेत्रावर संत्रा बागा आहेत. वर्षभरात संत्र्याचे आंबिया व मृग, अशा दोन बहरांचे उत्पादन घेतले जाते.

आंबिया बहर सध्या अंतिम टप्प्यात आहे. या बहरातील संत्रा उत्पादक फळगळतीने हवालदिल झाला होता. विशेषतः वरुड, मोर्शी या मुख्य उत्पादक पट्ट्याच्या तुलनेत अचलपूर, चांदूरबाजार व तिवसा या तालुक्यांत फळगळतीचे प्रमाण सर्वाधिक आहे.

संत्रा उत्पादकांना विमा संरक्षण देण्यात आले असले, तरी विमा परताव्याच्या ट्रिगरमध्ये फळगळतीचा निकष नाही. कमी-अधिक पाऊस, गारपीट, अवकाळी पाऊस, अधिक तापमान, पावसाचा खंड आदी ट्रिगर आहेत.

आंबिया बहरात दरवर्षी फळगळती होत आहे. बहुतांश संत्रा उत्पादक पट्ट्यातून या बाबत तक्रारी कृषी विभागाकडे केल्या जातात. जवळपास ३० ते ४० टक्के नुकसान होते. संत्रा उत्पादकास आंबिया बहरात १२ हजार रुपये व मृग बहरात चार हजार रुपये प्रति हेक्टर प्रीमियम भरावा लागतो.

आंबिया बहरातील प्रत्येक ट्रिगरमध्ये हेक्टरी २० हजार रुपये विमा परतावा मिळतो. परंतु फळ गळतीचा ट्रिगर नसल्यामुळे संत्रा उत्पादकांना गेल्या अनेक वर्षांत विमा भरपाई मिळाली नाही, हे मात्र वास्तव आहे.