Nashik News : गिरणा धरण ते नांदगाव स्वतंत्र पाणीपुरवठा योजना लवकरच पूर्ण होणार असून, माणिकपुंज-नांदगाव नव्याने झालेल्या पाइपलाइनमुळे या उन्हाळ्यात पाण्याची टंचाई जाणवणार नाही. त्यामुळे यंदा किमान पिण्याच्या पाण्याचा दुष्काळ दूर होणार आहे.

येथील येवला रस्त्यावर पालिका जलकुंभ स्थळावर दोन कोटी रुपये खर्चून माणिकपुंज ते पालिका जलकुंभ दरम्यानची नवी जलवाहिनी आज पूर्ण क्षमतेने कार्यान्वित झाली. आज या जलवाहिनीतून पालिका जलकुंभात पाणी पोहचले त्याचे लोकार्पण सौ. अंजूम कांदे यांच्या हस्ते झाले.

माजी नगराध्यक्ष अरुण पाटील, जी नगराध्यक्ष राजेश कवडे,काका सोळसे,चेतन पाटील,उद्योजक अनंत कासलीवाल, माजी नगरसेवक नितीन जाधव ॲड.सचिन साळवे, युवा सेना तालुकाप्रमुख सागर हिरे, शिवसेना शहर प्रमुख सुनील जाधव प्रकाश शिंदे, अयाज शेख, शशिकांत सोनवणे, विलास राजोळे, बद्रीनाथ सोनवणे, विद्याताई कसबे, भारती बागोरे, सीमा राजुळे,संगीता निकम, नीता दराडे, नेहा खटके, रिजवाना शेख, आदीं उपस्थित होते.

नांदगावसाठी तातडीची योजना म्हणून माणिकपुंज धरणातून अतिरिक्त स्वरूपात पाणी पुरवठा योजना कार्यान्वित आहे. मात्र धरण ते जलकुंभ पावेतो जलवाहिनीला नऊ किलोमीटर अंतरात अनेकदा गळत्या लागत असल्याने अपेक्षित दाबाने पाणी पुरवठा होत नव्हता.

आमदार सुहास कांदे यांनी वैशिट्यपूर्ण योजनेतून जलवाहिनी दुरुस्तीसाठी दोन कोटींचा निधी उपलब्ध करून दिला. चार किमी लोखंडी जलवाहिनीचे काम आज अखेरीला पूर्णत्वाला गेल्याचे सौ. कांदे यांनी सांगितले. मुख्याधिकारी शामकांत जाधव यांनी प्रास्ताविक केले.

‘गिरणा’च्या कामाला गती

नांदगावच्या पाणीपुरवठ्यासाठी आमदार सुहास कांदे यांनी पाठपुरावा केल्याने माणिकपुंजसाठी दोन कोटी तर गिरणा धरण योजनेसाठी पन्नास कोटी निधी मिळाले. सध्या गिरणाचेही काम जवळपास साठ टक्के इतके झाले आहे.