Sindhudurg News : भरघोस आणि गुणवत्तापूर्ण उत्पादनासाठी जमिनीचे आरोग्य महत्त्वाचे आहे. जमिनीच्या उत्तम आरोग्यासाठी नैसर्गिक आणि सेंद्रिय शेती गरजेची असल्याचे मत डॉ. बाळासाहेब सावंत कोकण कृषी विद्यापीठाचे विस्तार शिक्षण संचालक डॉ. प्रमोद सावंत यांनी व्यक्त केले.

किर्लोस कृषी विज्ञान केंद्र आणि छत्रपती शिवाजी कृषी महाविद्यालय, ओरोसच्या संयुक्त विद्यमाने छत्रपती शिवाजी महाराज यांच्या जयंतीनिमित्त ओरोस येथे तीन दिवसीय आनंदोत्सवाचे आयोजन करण्यात आले आहे.

या कार्यक्रमाच्या निमित्ताने नैसर्गिक शेती, आंबा, काजू मोहर संरक्षण, वन्य प्राण्यांपासून शेतीचे संरक्षण व बांबू लागवड कार्यशाळेचे आयोजन केले होते. या कार्यक्रमाला कृषी प्रतिष्ठानचे अध्यक्ष ब्रिगेडियर सुधीर सावंत, उपाध्यक्ष प्रदीप सावंत, शास्त्रज्ञ डॉ. आनंद हनुमंते, शास्त्रज्ञ डॉ. विजय देसाई, नागेश दप्तदार, डॉ. अजय राणे आदी उपस्थित होते.

डॉ. सावंत म्हणाले, की उत्तम शेतीसाठी जमिनीचे आरोग्य संतुलित राखणे ही काळाची गरज आहे. त्यामुळे भविष्यात नैसर्गिक शेतीला प्राधान्य देण्यात यावे जेणेकरून रासायनिक अवशेष मुक्त अन्न व आरोग्य सुरक्षा देता येतील. नैसर्गिक शेतीमुळे उत्पादन खर्चात बचत होते. त्यामुळे शेतकऱ्यांची आर्थिक बचत होऊन निव्वळ नफा वाढेल, असा विश्वास त्यांनी व्यक्त केला. त्यामुळे शेतकऱ्यांनी अधिकाधिक क्षेत्र नैसर्गिक आणि सेंद्रिय शेती करावी, असे आवाहनदेखील केले.

‘आत्मा’च्या प्रकल्प संचालक भाग्यश्री नाईकनवरे, कृषी विज्ञान केंद्राचे वरिष्ठ शास्त्रज्ञ बाळकृष्ण गावडे, वरिष्ठ शास्त्रज्ञ भास्कर काजरेकर, डॉ. विलास सावंत, विकास धामापुरकर, डॉ. केशव देसाई, विवेक सावंत-भोसले, सुमेधा तावडे, कृषी महाविद्यालयाचे प्राचार्य योगेश परुळेकर, प्राध्यापक, शेतकरी, महिला व विद्यार्थी उपस्थित होते.