Nanded News : जिल्ह्यात मागील तीन दिवसात झालेल्या दमदार पावसाने आजपर्यंत पडणाऱ्या पावसाने सरासरी गाठली आहे. १ जून पासून रविवार (ता.२७) पर्यंत सरासरी ३३६.६० मिलिमीटर पाऊस पडला.हा पाऊस हंगामी सरासरीच्या ९१.४२ टक्के इतका आहे. वार्षिक सरासरीच्या ३७.७५ टक्के पर्जन्यमान झाल्याची माहिती महसूलच्या सूत्रांकडून मिळाली.

नांदेड जिल्ह्यात मागील तीन दिवस पावसाने हजेरी लावली. जिल्ह्याच्या सर्वच भागात झालेल्या पावसामुळे खरिपातील पिकांना उभारी मिळाली आहे. जिल्ह्यात झालेला पाऊस तालुकानिहाय पाहता बिलोली (३६७.१० मिमी) व कंधार (३८२.४० मिमी) या तालुक्यांनी सरासरीहून अधिक पावसाची नोंद केली आहे.

त्यांची टक्केवारी अनुक्रमे ९९.९१ टक्के व ९५.०६ टक्के इतकी आहे. तर लोहा, हदगाव, भोकर व हिमायतनगर या तालुक्यांमध्ये सरासरीच्या तुलनेत कमी पावसाची नोंद झाली आहे. विशेषतः लोहा तालुक्यात केवळ ८३.४० मिमी पावसाची नोंद असून ती सरासरीच्या फक्त २७.७७ टक्के आहे. रविवारी सकाळपर्यंत नोंद झालेल्या आकडेवारीनुसार नांदेड तालुक्यात सर्वाधिक ८१.६० मिमी पावसाची नोंद झाली आहे.

तर किनवट व उमरी येथे अनुक्रमे २.५० मिमी आणि ३.५० मिमी इतका अल्प पाऊस झाला. मागील वर्षी याच कालावधीत ४१८.०० मिमी पावसाची नोंद झाली होती. त्या तुलनेत यंदाचा पाऊस ११३.५३ टक्के टक्केवारीने कमी आहे.

जिल्ह्यातील एकूण १५ तालुक्यांपैकी बहुतांश तालुक्यांमध्ये समाधानकारक पर्जन्यमान झाल्याचे दिसते. मात्र, काही तालुक्यांमध्ये अजूनही पावसाची प्रतीक्षा कायम आहे. आगामी काही दिवसांत मुसळधार पावसाची अपेक्षा व्यक्त होत आहे.

पर्जन्यमान आकडेवारी

वार्षिक सरासरी - ८९१.३०

आजपर्यंत पडणारा पाऊस - ३७६.१०

आजपर्यंत पडलेला पाऊस - ३३६.६०

वार्षिक सरासरीनुसार पाऊस - ३७.७५