Pune Rain: घाटमाथ्यावर संततधार सुरूच; धरणांतून विसर्ग

Pune News: पुणे जिल्ह्यातील पावसाचा जोर कमी झाला आहे. घाटमाथ्यावर आणि धरणक्षेत्रात पावसाची संततधार सुरू आहे. सोमवारी (ता. २८) सकाळी आठ वाजेपर्यंत मुळशी धरणक्षेत्रात सर्वाधिक १७५ मिलिमीटर पावसाची नोंद झाली आहे. या पावसामुळे जिल्ह्यातील धरणात पाण्याची आवक वेगाने वाढत असून विसर्ग वाढविण्यात आला आहे. 

गेल्या चार ते पाच दिवसांपासून जिल्ह्याच्या पश्चिम भागात जोरदार पाऊस पडत आहे. प्रामुख्याने घाटमाथ्यावर पावसाचा जोर अधिक होता. मागील दोन पावसात या भागात चांगलाच संततधार पाऊस कोसळत होता. त्यामुळे धरणांतील पाणीसाठा वेगाने वाढला असून आत्तापर्यंत जिल्ह्यातील २६ धरणांत  मिळून १७६.११ टीएमसी म्हणजेच ८८ टक्के पाणीसाठा झाला आहे. 

मागील चोवीस तासांमध्ये कुंडली घाटमाथ्यावर ८४ मिलिमीटर, तर ठोकरवाडी ४९, वळवण ६१ मिमी, लोणावळा ५० मिमी, शिरोटा ३२ मिलिमीटर पाऊस झाला आहे. त्यामुळे ओढे, नाल्याच्या पाणीपातळीत वेगाने वाढ झाली आहे. या पार्श्वभूमीवर नदीकाठच्या सर्व गावांना सतर्कतेचा इशारा जलसंपदा विभागाकडून देण्यात आला आहे.

मुठा खोऱ्यातील धरणक्षेत्रात पावसाचा प्रभाव अधिक होता. या धरणसाखळीतील टेमघर धरणक्षेत्रात सर्वाधिक ८६ मिलिमीटर, तर पानशेत ४३, वरसगाव ३९ मिलिमीटर पाऊस पडला असून खडकवासला धरणात तुरळक सरी बरसल्या. परंतु टेमघर, वरसगाव, पानशेत ही धरणे जवळपास भरली असल्याने खडकवासला धरणात पाण्याचा विसर्ग सोडण्यात आला आहे.

खडकवासला धरणातून सुमारे २५ हजार ८७३ क्युसेक वेगाने उजनी धरणात सोमवारी सकाळी विसर्ग सोडण्यात आला होता. निरा खोऱ्यातील वडीवळे धरणक्षेत्रात ७२ मिलिमीटर, तर पवना ३३ मिमी, आंध्रा २२ मिमी, गुंजवणी ४० मिमी, निरा देवघर ४२ मिलिमीटर पाऊस झाला आहे. तर उर्वरित भाटघर, नाझरे, कासारसाई, कळमोडी, चासकमान या धरणक्षेत्रात तुरळक, तर शेटफळ, वीर धरणक्षेत्रात पावसाची उघडीप असल्याचे चित्र होते. 

धरणनिहाय पाण्याचा विसर्ग (क्युसेकमध्ये)  

वरसगाव ९०७४, पानशेत ३६०८, खडकवासला २२६४६, पवना १९००, कासारसाई ४१४, कळमोडी ९१८, चासकमान ९९२०, आंध्रा ११५३, वडीवळे १८५५, नाझरे २३, गुंजवणी १८३१, भाटघर ६१०१, निरा देवघर ५३४०, वीर २५८७३, येडगाव १०००, वडज १७३०, डिंभे १००००, चिल्हेवाडी ३०१३, घोड १०,१००, विसापूर ६४, उजनी ५३,३६०, मुळशी ९७००.