Mumbai News : यंदाच्या रब्बी हंगामातील पिकांचा हमीभाव ठरविण्यासाठी केंद्रीय कृषिमूल्य आयोगाची मंगळवारी (ता. ११) सह्याद्री अतिथिगृहावर बैठक होत आहे. केंद्रीय कृषिमूल्य आयोगाचे विजय शर्मा, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस आणि अजित पवार यांच्या प्रमुख उपस्थितीत ही बैठक होणार असल्याच माहिती, राज्य कृषिमूल्य आयोगाचे अध्यक्ष पाशा पटेल यांनी दिली.

यंदाच्या रब्बी हंगामातील पिकांच्या हमीभावाची शिफारस करण्यासाठी दरवर्षी केंद्रीय कृषिमूल्य आयोग बैठक घेतो. मागील वर्षी काही पिकांच्या हमीभावात वाढ केली होती. राज्यातील गहू, हरभरा आणि अन्य कडधान्यांच्या हमीभावासाठी ही बैठक महत्त्वाची असून मागील वर्षी गहू, हरभरा, मसूर, मोहरी, सूर्यफुलाचे सुधारित दर जाहीर केले होते. त्यात किती वाढ होते हे उद्याच्या बैठकीत कळेल.

या बैठकीला कृषिमंत्री धनंजय मुंडे, केंद्रीय कृषिमूल्य आयोगाचे सचिव अनुपम मिश्रा, केंद्रीय कृषी सचिव परिमल सिंग, राज्य कृषिमूल्य आयोगाचे अध्यक्ष पाशा पटेल आणि राज्याच्या कृषी विभागाचे उपसचिव संतोष कराड उपस्थित राहणार आहेत.

सध्या देशात महाराष्ट्र आणि कर्नाटक या दोनच राज्यांत कृषिमूल्य आयोग असून अन्य राज्यांमध्ये हमीभाव निश्चितीसाठी स्वतंत्र यंत्रणा आहे. आज (ता. ११) होणाऱ्या बैठकीसाठी देशातील केवळ पाच राज्यांचे प्रतिनिधी उपस्थित राहणार आहेत.

गव्हाचे सर्वाधिक उत्पादन घेणाऱ्या पंजाब आणि अन्य राज्यांचे प्रतिनिधी या बैठकीपासून लांब आहेत. राजस्थान, मध्य प्रदेश, गुजरात, महाराष्ट्र आणि गोवा या राज्याचे प्रतिनिधी या बैठकीला उपस्थित राहणार आहेत.