Palghar News : मागील अनेक दिवसांपासून आगमनाची चाहूल देत असलेला माॅन्सून अखेर प्रकटला. त्यामुळे पालघर जिल्ह्यातील बळीराजा अखेर सुखावला आहे.

गतवर्षी होरपळून निघालेल्या शेतकऱ्यांनी यंदा चांगला पाऊस होईल, या आशेने जगाचा पोशिंदा उन्हाच्या झळा सोसत काही दिवसांपासून पेरणीपूर्व मशागतीची कामे पूर्ण करण्यास व्यग्र होता. आता पेरणीपूर्व मशागतीची कामे पूर्ण झालेली आहेत.

पावसाचे आगमन होताच जिल्ह्यातील शेतकरी भात पेरणीच्या तयारीला लागला आहे. अनेक शेतकऱ्यांनी माॅन्सूनच्या मुहूर्तावरच पेरणीचा मुहूर्त साधला आहे.

पालघर जिल्ह्यात गुरुवारी (ता. १९) काही ठिकाणी जोरदार पावसाचा इशारा देण्यात आला आहे.

१९ ते २६ जूनदरम्यान पालघर जिल्ह्यात सरासरीपेक्षा जास्त पावसाचा अंदाज व्यक्त करण्यात आला आहे. त्यामुळे यापुढे शेतकरी भात रोपवाटिकेच्या पेरणीला सुरुवात करू शकतात. आता पावसाचे सातत्य राहणार आहे. त्यामुळे शेतकऱ्यांनी भात पेरणीला सुरुवात करावी, असे कृषी शास्त्रज्ञांकडून सांगण्यात आले आहे.