राज्यातील शालेय पोषण आहाराचा मुद्दा काय चर्चेचा विषय ठरलेला आहे. शालेय विद्यार्थ्यांना पोषण युक्त आहार दिला जावा, यासाठी राज्य सरकार नवीन पदार्थांची यामध्ये शिफारस करतं. परंतु वस्तुस्थिती मात्र उलट आहे, याकडे विधानपरिषदेत आमदार सत्यजीत तांबे यांनी सभागृहाचं शुक्रवारी (ता.२०) लक्ष वेधलं. यावेळी त्यांनी शालेय पोषण आहारात सोयाबीन आणि द्राक्षापासून तयार करण्यात आलेल्या पदार्थांचा समावेश करावा, अशी मागणी देखील केली.

तांबे म्हणाले, "शालेय पोषण आहाराबाबत कर्मचाऱ्यात मोठी नाराजी आहे. मुंबईतील अधिकारी शालेय पोषण आहार ठरवतात. परंतु प्रत्यक्षात मात्र पोषण आहारात जे पदार्थ बनवण्याची सोयच नाही, अशा पदार्थाची सक्ती शालेय पोषण आहारात केली जात आहे. त्याऐवजी सोयाबीनचे पदार्थ आणि द्राक्षाचे मनुके (बेदाणा) वापरावे," अशी मागणी तांबे यांनी केली.

पुढे तांबे म्हणाले, राज्यातील सोयाबीन उत्पादक शेतकऱ्यांना न्याय मिळत नाही. द्राक्ष बागायतदार शेतकऱ्यांना न्याय मिळत नाही. या शेतकऱ्यांच्या शेतमालापासून राज्यात तयार होणारे पदार्थ शालेय पोषण आहारात घेतले तर त्याचा फायदा विद्यार्थी आणि शेतकरी या दोन्ही समाजघटकांना होईल." अशी मागणी तांबे यांनी केली.

दरम्यान, राज्यातील शालेय पोषण आहारात अंडी देण्याचा निर्णय अलीकडेच राज्य सरकारने घेतला. त्यावर विविध संघटनांनी आक्षेप घेतला होता. तसेच यंदा मनुके देण्याचा निर्णयही घेण्यात अॅला होता. २०११ पासून आठवड्यातून एक दिवस पूरक आहार म्हणून विद्यार्थ्यांना फळे, दूध, चिक्की, राजगीरा, लाडू गूळ, शेंगदाणे, चुरमुरे दिले जातात.