Jalgaon News : जिल्ह्यात सूक्ष्मसिंचन अनुदान दिवाळीच्या काळात वितरणास सुरुवात झाली. परंतु अनेक शेतकरी या अनुदानापासून वंचित आहेत. सुमारे १० हजार शेतकऱ्यांना अनुदानाच्या दुसऱ्या हप्त्याची प्रतीक्षा आहे. तर अनेकांना पहिला हप्ता मिळालेला नाही.

जळगाव, चोपडा, यावल, रावेर, जामनेर भागातही अनुदानाच्या प्रतीक्षेत असलेल्या शेतकऱ्यांना न्याय मिळावा, अशी मागणी केली जात आहे. शासनाने ऑक्टोबर महिन्यातच ठिकबबात अनुदान मंजूर केले होते. निवडणुकीपूर्वी ही कार्यवाही झाली. नंतर निवडणूक काळात अनुदान आले नाही.

जिल्ह्यासाठी सुमारे २५ कोटी रुपये अनुदान प्राप्त झाले होते. हे अनुदान प्राप्त झाल्यानंतर त्याचे अनेक दिवस वितरणच झाले नाही. परंतु नोव्हेंबरमध्ये काही भागात अनुदान देण्यात आले. अनुदान डीबीटी पद्धतीने देण्यात आले.

परंतु अनेक भागांत शेतकरी पहिल्या हप्त्याच्या प्रतीक्षेत आहेत. मागील फेब्रुवारी व मार्च महिन्यात ज्या शेतकऱ्यांच्या क्षेत्रात जिओ टॅगिंग झाली व त्यांचे प्रस्ताव मार्गी लागले. परंतु नंतर झालेल्या शेतकऱ्यांचे प्रस्ताव मार्गी लागलेले नाहीत.

जिल्ह्यात सुमारे १५ हजारांवर शेतकरी अनुदानाच्या प्रतीक्षेत आहेत. अनेक शेतकऱ्यांनी उसनवारी करून ठिबकवर खर्च केला. त्यासाठी अनुदान मिळेल, अशी अपेक्षा शेतकऱ्यांना होती. परंतु हे अनुदान प्राप्तच झालेले नाही. शासन ज्या योजनांबाबत मागणी नव्हती,त्या योजना आणत आहे व त्यावर खर्च करीत आहे.

परंतु शेतकऱ्यांना ठिबकच्या अनुदानासाठी वर्षभर किंवा यापेक्षा अधिक कालावधी प्रतीक्षा करावी लागत आहे. यामुळे शेतकऱ्यांमध्ये रोष तयार झाला आहे. नव्याने योजनेसाठी निधी नसल्याने ठिबकचे नवे प्रस्ताव तयार होत नसल्याची स्थिती आहे. पोखरा योजनेतूनच शेतकऱ्यांना हा लाभ आहे. पण पोखरा योजनेतील गावांची संख्या कमी आहे.

सूक्ष्मसिंचन योजनेत ठिबक संच अधिकचे घेण्यात आले आहेत. तसेच तुषार संचही अनेकांनी घेतले आहेत. काही ठिबक वितरकांनी विश्वासावर उधारीने शेतकऱ्यांना अनुदान येईल, यासाठी ठिबक दिले आहे. परंतु अनुदान आलेले नसल्याने अनेक ठिबक वितरक अडचणीत आले आहेत. अनुदान वितरण गतीने व तातडीने केले जावे. कृषी विभागाने त्याबाबत तत्परतेने काम करावे, अशी अपेक्षाही व्यक्त केली जात आहे.