Sugarcane Season : १५ नोव्हेंबरपासून राज्यातील ऊस गळीत हंगाम सुरू होणार आहे. यापार्श्वभूमीवर राज्यातील साखर कारखान्यांकडून तयारी केली जात आहे. ऊसतोडीसाठी कोल्हापूर, सांगली, सातारा या जिल्ह्यातील साखर कारखान्यांमध्ये परजिल्ह्यातून जनावरांसह मजूर येत असतात. यामुळे लम्पी आजाराचा फैलाव रोखण्यासाठी पशुसंवर्धन विभागाने परजिल्ह्यातील जनावरांना लसीकरण सक्तीचे केले आहे. लसीकरण न करता व बाधित जनावरे आढळल्यास त्यांच्यावर पशुसंवर्धन विभागाच्या वतीने उपचार केले जाणार आहेत.

ऑगस्ट २०२३ मध्ये पहिल्या आठवड्यात लम्पी आजाराने राज्यात पहिल्यांदा जळगाव जिल्ह्यात शिरकाव केला. त्यानंतर हळूहळू राज्यभरात या आजाराचा फैलाव वाढत जाऊन जनावरे दगावण्याचे प्रमाणही वाढले होते. त्यानंतर पशुसंवर्धन विभागाने उपाययोजना राबवीत लम्पी आजाराला आटोक्यात आणले होते.

मात्र, मागील दोन महिन्यांपासून लम्पीचा फैलाव वाढला आहे. त्यातच आता ऊसतोडणीचा हंगाम सुरू होणार असल्याने परजिल्ह्यातून ऊसतोड कामगारांच्या बैलजोड्या मोठ्या प्रमाणात येणार आहेत. या बैलांमुळे लम्पी आजार फैलावण्याचा धोका अधिक असल्याने उपाययोजना राबविण्यास सुरुवात केली आहे.

पशुसंवर्धन विभाग कारखान्यांच्या हद्दीत जाऊन बैलांची तपासणी करणार आहे. परजिल्ह्यातील गोवर्धनीय जनावरांना लसीकरण सक्तीचे केले आहे. अन्य ठिकाणांहून येणाऱ्या ऊसतोड कामगारांनीही बैलांचे लसीकरण करणे आवश्यक आहे. तशा सूचना कारखान्यांनाही दिल्या पाहिजेत, जेणेकरून लम्पीचा प्रादुर्भाव रोखणे शक्य होणार आहे.

कारखानास्थळावर तपासणी मोहीम

जनावरांचा लम्पी आजार रोखण्यासाठी पशुसंवर्धन विभागाने विविध उपाययोजना राबविण्यास सुरुवात केली आहे. १५ नोव्हेंबरपासून ऊसतोड हंगाम सुरू होणार असून, ऊसवाहतूक करणाऱ्या बैलजोड्यांची तपासणी सुरू केली आहे. याचबरोबर कारखानास्थळावर पशुसंवर्धन विभागाच्या वतीने जनावरांची तपासणी मोहीम राबविणार असल्याचे पशुसंवर्धन विभागाच्या वतीने सांगण्यात आले आहे.