Nanded News : दक्षिण भारतातील प्रसिद्ध माळेगाव यात्रा २९ डिसेंबर २०२४ ते २ जानेवारी २०२५ या पाच दिवसांच्या कालावधीमध्ये भरणार आहे. २९ डिसेंबर रोजी देवसवारी आणि पालखी पूजनाने यात्रेची सुरुवात होणार आहे.

पाच दिवसांमध्ये कृषी व पशुप्रदर्शन, कृषिनिष्ठ शेतकऱ्यांचा सत्कार, अश्‍व, श्‍वान, कुक्कुट प्रदर्शन व विविध स्पर्धा, कुस्त्यांची दंगल, पारंपरिक लोककला महोत्सव, महिला आरोग्य शिबिर, लावणी महोत्सव होणार असल्याची माहिती जिल्हा परिषदेच्या मुख्यकार्यकारी अधिकारी मीनल करणवाल यांनी दिली.

जिल्हा परिषदेच्या यशवंतराव चव्हाण सभागृहात माळेगाव यात्रा संदर्भात पत्रकार परिषद घेण्यात आली, त्या वेळी त्यांनी माहिती दिली. या प्रसंगी अतिरिक्त मुख्य कार्यकारी अधिकारी संदीप माळोदे, सामान्य प्रशासन विभागाचे उपमुख्य कार्यकारी अधिकारी राजकुमार मुक्कावार, पंचायत विभागाच्या उपमुख्य कार्यकारी अधिकारी मंजूषा जाधव-कापसे, जिल्हा आरोग्य अधिकारी डॉ. संगीता देशमुख यांच्यासह सर्व विभाग प्रमुखांची उपस्थिती होती.

माळेगाव यात्रा यंदाही संस्मरणीय ठरविण्यासाठी जिल्हा प्रशासन कामाला लागले आहे. यंदा अधिक मूलभूत सुविधा उपलब्ध केल्या जाणार आहेत. या यात्रेचे औचित्य, महत्त्व आणि परंपरेला जोपासण्यासाठी जिल्हा परिषदेमार्फत पूर्ण प्रयत्न केले जातील, अशी ग्वाही जिल्हा परिषदेच्या मुख्य कार्यकारी अधिकारी तथा प्रशासक मीनल करणवाल यांनी दिली.

यंदाची यात्रा प्लॅस्टिकमुक्त यात्रा करण्यावर भर असेल. कचरा व्यवस्थापनासाठी ट्रॅक्टर, हॉटेल व खाणावळीसाठी डस्टबिन्स ठेवण्यात येतील. मंदिर परिसरात प्लॅस्टिक मुक्तीसाठी जनजागृती आणि महिला बचत गटांकडून कापडी पिशव्यांचे स्टॉल्स उभारले जातील. ॲम्ब्युलन्स आणि रुग्णवाहनासाठी बाइक सेवा सुरू करण्यात येणार आहे. सीसीटीव्ही कॅमेरे बसवले जात आहेत. पोलिस प्रशासनाच्या मदतीने चोख बंदोबस्त ठेवला जाणार आहे. रस्ते मोकळे ठेवून छोटे व्यापारी एकत्रितपणे ठरावीक जागेवर दुकाने लावू शकतील, असे जिल्हा परिषदेने नियोजन केले आहे.

जिल्हा परिषदेने महावितरण, सार्वजनिक बांधकाम विभाग, आरोग्य विभाग, पोलिस प्रशासन, अन्न व औषध प्रशासन, अग्निशमन, राज्य उत्पादन शुल्क, बीसएसएनएल, राज्य परिवहन महामंडळ, देवस्थान समिती आणि अन्य विभागांच्या समन्वयाने यात्रा यशस्वी करण्यासाठी तयारी सुरू केली असल्याचे मुख्य कार्यकारी अधिकारी मीनल करणवाल यांनी सांगितले.

माळेगाव यात्रेतील पाच दिवसांचे कार्यक्रम

२९ डिसेंबर : देवसवारी आणि पालखी पूजन, महिला व बालक स्पर्धा, भव्य कृषी व पशुप्रदर्शन, कृषिनिष्ठ शेतकऱ्यांचा सत्कार.

३० डिसेंबर : अश्‍व, श्‍वान, कुक्कुट प्रदर्शन, स्पर्धा, महिला आरोग्य शिबिर.

३१ डिसेंबर : कुस्त्यांची दंगल.

१ जानेवारी : पारंपरिक लोककला महोत्सव.

२ जानेवारी : लावणी महोत्सव.