Nashik News : विभागातील पाचही जिल्ह्यांत गावपातळीपासून जिल्हा पातळीपर्यंत १ ते ७ जुलै या कालावधीत महसूल विभागातर्फे महसूल सप्ताह राबविण्यात येणार आहे. या योजना अधिकाधिक नागरिकांपर्यंत पोहोचविण्यासाठी नाशिक विभागीय आयुक्तालयाने ‘महसूलदूत’ ही संकल्पना राबविण्याचे ठरविले आहे.

संपर्काची आवड असणाऱ्या इच्छुक महाविद्यालयीन युवक-युवतींना महसूलदूत म्हणून शासनाच्या या उपक्रमात सहभाग घेता येणार आहे, अशी माहिती विभागीय आयुक्त डॉ. प्रवीण गेडाम यांनी दिली. संबंधित महसूल विभाग अथवा तहसील कार्यालय क्षेत्रात अथवा जास्त लोकसंख्या असणाऱ्या गावांमध्ये हे महाविद्यालयीन युवक-युवती महसूलदूत म्हणून काम करणार आहेत.

महसूल विभागामार्फत राबविण्यात येणाऱ्या विविध योजना आणि पुरविण्यात येणाऱ्या सेवांविषयी लोकजागृतीच्या दृष्टिकोनातून प्रत्येक महाविद्यालयातील एक कार्यशील युवक व युवती यांची नेमणूक त्यासाठी करण्यात येणार आहे.

यासाठी तालुकापातळीवर संबंधित तहसीलदार, अपर तहसीलदार हे त्यांच्या कार्यक्षेत्रातील सर्व कनिष्ठ महाविद्यालये, महाविद्यालये, आयटीआय आदींच्या प्राचार्यांशी चर्चा करून कार्यशील, उत्तम नेतृत्वगुण आणि तंत्रज्ञान वापराची आवड असणाऱ्या युवक व युवतींची निवड करण्याबाबत कळविण्यात आले असल्याचेही डॉ. गेडाम यांनी सांगितले.

उत्कृष्ट काम करणाऱ्या महसूलदूतांचा होणार गौरव

महसूल विभागाच्या कामकाजात तरुणांचा सहभाग वाढावा, महसूल विभागाची प्रतिमा उंचावण्यासाठी युवकांच्या कल्पकतेचा वापर या विविध योजनांच्या प्रभावी अंमलबजावणीसाठी व्हावा, यासाठी डिजिटल क्रॉपसर्व्हे प्रणालीद्वारे पीक पाहणी नोंदविणे, ई-हक्क प्रणालीचा ११ प्रकारच्या फेरफार नोंदी सात-बारावर घेण्यासाठी वापर करणे, महसूल विभागामार्फत शैक्षणिक व नोकरीसाठी आवश्यक प्रमाणपत्रे/दाखले यांच्यासाठी लागणारी कागदपत्रे व प्रक्रिया यांची माहिती देणे, महसूल विभाग राबवित असलेल्या विविध योजनांची माहिती देणे याबाबत प्रशिक्षण देण्यात येणार असून, उत्कृष्ट काम करणाऱ्या महसूलदूतांना गौरविण्यात येणार असल्याचेही श्री. गेडाम यांनी सांगितले.