Nashik News : राज्य शासनाच्या शंभर दिवसांच्या कार्यक्रमात विविध विभागांनी उल्लेखनीय कामगिरी बजावली आहे. त्यानंतर शासनाने आता दीडशे दिवसांचा कार्यक्रम दिला आहे. जिल्ह्यात त्याची प्रभावीपणे अंमलबजावणी करताना ई-ऑफिस प्रणालीचा वापर करावा. जिल्ह्याचे ‘व्हिजन डॉक्युमेंट’ तयार करावे, अशा सूचना पालक सचिव एकनाथ डवले यांनी केल्या.

जिल्हाधिकारी कार्यालयात गुरुवारी (ता. १९) राज्य शासनाच्या दीडशे दिवसांच्या कार्यक्रमाचा पालक सचिव डवले यांनी आढावा घेतला. त्या वेळी ते बोलत होते. विभागीय आयुक्त डॉ. प्रवीण गेडाम, विशेष पोलिस महानिरीक्षक दत्तात्रेय कराळे, पोलिस आयुक्त संदीप कर्णिक, जिल्हाधिकारी जलज शर्मा, महापालिका आयुक्त मनीषा खत्री, अतिरिक्त आयुक्त करिश्मा नायर, जिल्हा परिषद मुख्य कार्यकारी अधिकारी आशिमा मित्तल,पोलिस अधीक्षक बाळासाहेब पाटील यांच्यासह विविध विभागांचे प्रमुख अधिकारी उपस्थित होते.

डवले म्हणाले, की शासनाच्या शंभर दिवसांच्या समारोपप्रसंगी मुख्यमंत्री देवेंद्र फडणवीस यांनी भविष्यातील वाटचालीसाठी विकसित महाराष्ट्र २०४७ च्या अनुषंगाने ‘व्हिजन डॉक्युमेंट’ तयार करण्यासाठी दीडशे दिवसांच्या कार्यक्रमाची घोषणा केली आहे. त्यामध्ये दीर्घकालीन म्हणजे २०४७ पर्यंत गाठावयाची उद्दिष्टे, मध्यमकालीन उद्दिष्टे म्हणजे राज्याच्या अमृत महोत्सवापर्यंत गाठावयाची उद्दिष्टे आणि अल्पकालीन म्हणजे २ ऑक्टोबर २०२९ पर्यंतच्या पाच वर्षांत वर्षनिहाय गाठावयाच्या उद्दिष्टांचा समावेश आहे.

दीडशे दिवसांच्या कार्यक्रमात विकसित महाराष्ट्र २०४७, ई-गव्हर्नन्स, सेवाविषयक, प्रशासकीय सुधारणांचाही समावेश आहे, अशी माहिती त्यांनी दिली. दैनंदिन कामकाजात तंत्रज्ञानाचा अधिकाधिक वापर करावा. आगामी काळात शंभर टक्के ई-ऑफिस प्रणालीचा वापर करावा, अशा सूचनाही डवले यांनी दिल्या. डॉ. गेडाम यांनीही मार्गदर्शन केले. जिल्हाधिकारी शर्मा यांनी दीडशे दिवसानिमित्त जिल्हा प्रशासनातर्फे सुरू असलेल्या कार्यवाहीची माहिती दिली.

कामांना गती द्या, गुणवत्तेकडे लक्ष द्या

डवले यांनी नाशिक-त्र्यंबकेश्वर येथे भरणाऱ्या सिंहस्थ कुंभमेळ्याच्या अनुषंगाने सुरू असलेल्या विविध विकासकामांचा आढावा घेतला. त्यांनी कामांना गती देताना ती गुणवत्तापूर्वक होतील, याकडे लक्ष द्यावे, असे निर्देश दिले. करिश्मा नायर यांनी सिंहस्थ कुंभमेळ्यानिमित्त सुरू असलेल्या विकासकामांची माहिती दिली.