Sindhudurg News: सिंधुदुर्ग जिल्ह्यात ‘लम्पी स्कीन’मुळे आतापर्यंत ६०० जनावरांना प्रादुर्भाव झाला असून, ८ जनावरे दगावली आहेत. लम्पीचा विळखा अधिक घट्ट होत असल्यामुळे पशुपालकांमध्ये भीतीचे वातावरण दिसून येत आहे.

जिल्ह्यात जूनच्या पहिल्या आठवड्यापासूनच लम्पी स्कीनचा प्रादुर्भाव सुरू झाला होता. परंतु पशुसंर्वधन विभागाने त्याबाबत गुप्तता पाळली होती. मात्र जुलैमध्ये प्रादुर्भाव झपाट्याने वाढू लागला. जिल्ह्यातील मालवण, कुडाळ, देवगड, वेंगुर्ला, सावंतवाडी या तालुक्यांमध्ये अधिक प्रादुर्भाव होता.

परंतु त्यानंतर कणकवली, वैभववाडी आणि देवगड तालुक्यांत प्रादुर्भाव वाढू लागला. जिल्ह्यात आतापर्यंत ६०० जनावरे बाधित झाली असून, त्यापैकी ८ जनावरे दगावली आहेत. ४१८ जनावरांवर उपचार झाले आहेत. सध्या १७४ जनावरांवर उपचार सुरू आहेत.